Премиерот Оливер Спасовски во телефонскиот разговор со неговиот хрватски колега Андреј Пленковиќ истакнал дека апсолутно е за поддршка на пораката дека Самитот во Загреб ќе се одржи до крајот на хрватското претседателство со ЕУ, соопштија од Владата.
Одржувањето на самитот, рекол Спасовски, е силна порака дека Западен Балкан останува приоритет за ЕУ и покрај тешките денови за регионот, за Европа и за светот.
„Премиерите Спасовски и Пленковиќ разговараа за ситуацијата во двете држави во врска со справувањето со пандемијата на ковид-19. Беа разменети информации и искуства за справувањето со здравствената криза и со економските последици од неа. Двајцата премиери искажаа подготвеност за меѓусебна поддршка за спроведување на досегашните мерки и потенцираа дека само со заеднички напори, меѓусебна помош и европска солидарност на дело може да надминат актуелните предизвици“,
наведуваат од Владата.
Пленковиќ, посочуваат од Владата, деновиве разговара со сите превидени учесници на Самитот на ЕУ за Западен Балкан, кој првично требаше да се одржи на 7 мај.
Неодамна, поради пандемијата со ковид-19, хрватското претседателство објави дека се одложува овој самит и оти во договор со претседателот на Европскиот совет, Шарл Мишел, ќе се обиде да се најде нов термин за негово одржување во јули, ако дозволува ситуацијата.
„Алтернативно, во неможност да се одржи физички состанок, ќе се предложи состанокот да се одржи со помош на видео врска (до крајот на хрватското претседателство)“,
пишуваше во соопштението.