Најголема грижа, како што вели Петличковски, е спречување на ширењето на инфекцијата кај децата кои се најзасегнати и најризични по однос на оваа болест и додаде дека останува препораката за надополнување на пропуштените вакцинални дози
Состојбата со голема кашлица се уште не е стабилна бидејќи има пораст на потврдени случаи, но од Комисијата за заразни болести (КЗБ) велат дека е под контрола.
Според податоците на Комисијата во моментов во земјава се потврдени 56 случаи на луѓе заразени со голема кашлица, од кои 46 се од Скопје, а има и во Тетово, Гостивар и Куманово.
Претседателот на Комисијата за заразни болести, Александар Петличковски вели дека од вкупниот број на случаи 14 се деца под една година, а девет дополнително се на возраст од 1 – 4 години. Од останатите, како што вели Петличковски, 16 лица се невакцинирани, а 12 се некомплетно вакцинирани.
„За разлика од последниот пат кога правевме пресек на епидемиолошката состојба сега се појавуваат и адолесценти, деца на возраст 10 до 14 години и повозрасни и веројатно во тек на следните недели ќе има малку промена на оваа демографска структура на позитивните случаи, односно очекуваме кај повозрасните и почесто да се потврдува оваа болест“,
рече Петличковски на денешната прес-конференција.
Најголема грижа, како што додаде тој, е спречување на ширењето на инфекцијата кај децата, кај малите деца бидејќи децата до една година се најзасегнати, односно најризични по однос на оваа болест.
Петличковски напомена дека останува препораката за надополнување на пропуштените вакцинални дози. Од 18 јануари кога беше дадена првата препорака, до 14 февруари, како што рече Петличковски, вакцинирани се над 13 илјади деца, што, според него, е солиден одзив, но како што кажа, се уште има илјадници деца кои требало да се вакцинираат, а не се вакцинирани.
Тој најави дека до крајот на неделата ќе биде обелоденето упатството кое го најавија од Институтот за јавно здравје, а кое, како што рече, е сеопфатно упатство за однесување, за постапки, за тек на нештата во услови на епидемија и откако ќе се додадат некои забелешки и идеи за подобрување, ќе биде објавено и испратено до сите инволвирани во процесот.
Петличковски рече дека на денешниот состанок на Комисијата за заразни болести разговарале и за тестирањето, за начинот на организација на тестирањето за што повеќе лаборатории од јавното здравство да бидат спремни да одговорат на барањата за тестирање.
„Во следниве денови навистина брзо очекуваме да се реагира, да се проценат лабораториите кои исполнуваат услови за воведување на ова тестирање и исто така да се назначи, да се формира една референтна државна лабораторија, во која би можеле да се потврдуваат случаите на пертусис позитивни од приватни лаборатории. Тоа ни се заклучоците од денешниот состанок“,
кажа тој.
Во однос на тоа дали возрасните треба да се ревакцинираат, Петличковски рече дека болеста пертусис за возрасни луѓе не е тешка болест, за неа има достапен лек и нема потреба од страв.
„Возрсните луѓе, како преносители на малите деца, се опасни и затоа се размислува и се препорачува во ова упатство и нивна заштита. Прво заштита со вакцини, второ со заштита со антибиотици. Вакцини за возрасни во мометот, нема, но сме многу блиску да дојдат да се набават, мислам дека е прашање на ден, бидејќи е отпочната постапка, има најава дека ќе пристигнат многу скоро, и мислам дека од почетокот на следната недела би можеле да сметаме и на овие дози. Таа вакцина за возрасни е истата вакцина што се препорачува и за трудници“,
додаде Петличковски.
Тој вели дека вакцините обезбедуваат имунитет што трае меѓу пет и десет години и е многу солиден, и поентата на вакцинирањето е да се преброди критичниот период на возраст за оваа болест.
„Возрасните луѓе во нормални околности не мора да примаат засилувачки дози. Возрасните кои живеат во заедници каде што има мали деца под една година, треба да бидат заштитени со дополнителна доза токму со цел да не ја пренесат болеста на нив“,
рече Петличковски.
Во врска со носење невакцинирани деца во градинките, Петличковски кажа дека врз основа на препораката и врз основа на пријавените случаи, Центарот за јавно здравје Скопје прогласува епидемија на Град Скопје.
„Следната точка е постапување на Министерството за труд и социјална политика (МТСП) по препораките на Комисијата за здравствена заштита. Дел од градинките постапуваат по таа одлука, дел не постапуваат. Мислам дека тука има малку застој во комуникацијата меѓу двете министерства, веројатно писмената порака уште патува, но сигурно ќе стигне многу скоро“,
рече Петличковски.
Портпаролот на Комисијата, Злате Мехмедовиќ, во врска со можноста за појава на епидемија на морбили кај нас, како во некои европски земји, особено во Романија, вели дека родителите треба да бидат совесни и да ги вакцинират своите деца и оти тоа е основниот принцип на заштита.
„Деведесет и пет проценти вакцинирани против било кое заболување ни гарантира дека ние имаме безбедна популација и дека нема да имаме ширење зараза. Кампањата треба да трае континуирано. Интензивно комуницираме со вакциналните тимови да ни ги кажат основните проблеми, а проблем број еден е антиваксерско движење и ширењето бомбастични наслови коишто одат спротивно од она што тие го работат и го загрозуваат јавното здравје“,
рече Мехмедовиќ.