Петличковски вели дека ефектите од сегашниот наплив за вакцинирање нема да се видат веднаш, но секој ден порано вакциниран, како што рече е инвестиција во подобра иднина и додава дека ефектот од овие вакцинации ќе се види за околу две недели
Бројот на лица заболени од голема кашлица во земјава сигурно не се 22 или 26, туку се многу повеќе, вели проф. д-р Катерина Ставриќ, детски имунолог.
„Сигурно дека овие 26 случаи се разболеле во контакт со домашните, во градинка или во училиште. Затоа бројот на заболени лица е многу поголем. Но, главно, малата возраст, децата под пет години се тие кои се најчесто дијагностицирани, бидејќи тие пројавуваат потешка клиничка слика. Поголемите деца, повозрасните, можеби се вакцинирани лица со ослабен имунитет, меѓутоа доволен за да даде една лесна клиничка слика која за нив можеби и не е препозната дека е пертусис, туку можеби е сфатена како друга вирусна инфекција која дава една продолжена кашлица кај тие пациенти“,
рече Ставриќ.
Претседателот на Комисијата за заразни болести, проф. д-р Александар Петличковски е согласен дека бројката е ирелевантна и оти е реално да се очекува зголемување на бројот на случаи на пертусис овие денови и недели
„Затоа и Комисијата се одлучи за превентивни мерки, мислам навреме, со цел да спречиме огромно зголемување кое може да биде сериозно и да донесе проблеми какви што ги гледаме во околните земји“,
рече Петличковски кој, исто така, гостуваше во вечерашната „Топ тема“.
Петличковски рече дека бројот на случаи со пертусис, сметајќи ги и денешните четири нови случаи, се искачи на вкупно 26 во земјава.
„Најголем дел од заболените лица се невакцинирани деца, но меѓу потврдените случаи има и вакцинирани. Има и некомплетно вакцинирани. Околу 80 отсто мислам дека се комплетно невакцинирани деца. Најголем дел се деца до петгодишна возраст, но потврдени случаи има и кај родени во 1979 година, во 1973 година“,
рече Петличковски.
Според него, моментално нема информации дека некој од згрижените пациенти е во потешка состојба.
„Најголем дел од нив се дијагностицираат и се испраќаат на домашно лекување. Мислам дека во тој поглед ситуацијата е стабилна“,
додаде Петличковски.
Ставриќ и Петличковски се согласни дека вакцинацијата е дефинитивно број еден мерка што може да ја спречи епидемијата.
„Ние сме среќни што 30 години не сме виделе пертусис и тоа е токму поради високиот опфат на вакцинацијата. За жал последните четири, пет години, а и ковид-19 тука влијаеше, за децата да се заборават или пропуштат вакцините или ревакцините и сега ни се јавува ова што го имаме“,
рече Ставриќ.
Петличковски вели дека ефектите од сегашниот наплив за вакцинирање нема да се видат веднаш, но секој ден порано вакциниран, како што рече е инвестиција во подобра иднина.
„Ефектот од овие вакцинации ќе го видиме за околу две недели, меѓутоа за комплетно пројавување на ефикасноста е неопходно барем првите три дози да бидат заокружени“,
додаде Петличковски.