Од утрово во вакциналниот пункт „Букурешт“ во Скопје е зголемен бројот на пациенти, пред сѐ деца поголеми од три години, кои ги пропуштиле дозите од редовната вакцинација, според календарот за имунизација
По зголемениот број случаи со голема кашлица, се зголеми интересот за вакцинирање, информираат денеска од вакциналниот пункт „Букурешт“ во Скопје од каде што најавија и двосменско работење и работа в сабота.
Оттаму наведуваат дека по зголемениот број случаи со голема кашлица, од утрово зголемен е бројот на пациенти, пред сѐ деца поголеми од три години, кои ги пропуштиле дозите од редовната вакцинација, според календарот за имунизација.
„Од утрово до 11 часот имавме вакцинирано околу 60 дечиња. Ако вообичаено бројките на дневно ниво ни се меѓу 20 и 30, денеска и тоа засега, бројката ни е двојно поголема. Тука е нели стравот на родителите, но и мерката за забрана во градинките за невакцинираните“,
изјави Сања Цилевска-Младеновска, лекар педијатар.
Доктор Бети Гелејчевска-Илковска појасни дека пред да ги вакцинираат децата, родителите најчесто прашуваат зошто да се примаат вакцините во толку рана возраст, кој е производителот на вакцините, кои се несаканите реакции од примената вакцина.
Силвана Миркоска, главна сестра, информира дека штотуку ги добиле насоките од Министерството за здравство, започнување со работа во две смени и работа во сабота.
Министерот за здравство Фатмир Меџити вчера на брифинг со новинарите истакна дека ќе го потпише документот за прогласување епидемија на голема кашлица во Скопје, откако претходниот ден Комисијата за заразни болести даде таква препорака.
Според него, препораката од Комисијата за заразни болести за забрана за прием на невакцинирани деца во градинките треба да се сфати во позитивен контекст.
„Ова не е дека е некоја забрана или сакаме некого да казниме. Сакаме нивните деца да бидат здрави и живи, да имаме подобра иднина како држава. Апелирам до сите родители, ве молам, вакцините заштитуваат живот“,
рече министерот за здравство.