Сојузот на средношколци продолжува со бојкот на наставата со барање за измени на концептот за државна матура, со кои наместо четири матурантите би полагале два предмета.
Претседателот на Сојузот, Бленди Ходаи, за МИА вели дека денеска ги продолжуваат и состаноците со пратенички групи во Собранието.
Откако викендов добија поддршка од пратениците од ВМРО-ДПМНЕ, денеска, вели, ќе имаат состанок со пратеничката група на СДСМ и претседателката на собраниската Комисија за образование, наука и спорт Жаклина Лазаревска, како и со Левица, Беса и Алијанса за Албанците и Алтернатива, а за утре имаат состанок со ДУИ.
Сојузот бара Собранието да организира јавна расправа и законски измени за државната матура кои ќе важат само за оваа учебна година.
Министерството за образование и наука е категорично дека измени на концептот не може да се прават во од и се можни за наредната учебна година, но, како што велат оттаму, им излегуваат во пресрет со тоа што ќе бидат скратени програмите и поедноставен материјалот од периодот кога почна пандемијата.
За Сојузот е спорно и тоа што скратувањето на наставните програми е предвидено само за четири, а не за сите предмети на државната матура.
„Кратењето на програмите е предлог на МОН и ние се согласуваме, но проблемот е што предлогот е само за четири предмети – мајчин јазик, географија, математика и хемија. Тоа беше соопштено на 21 декември“,
додаде Ходаи.
МОН не отстапува од актуелниот концепт за државна матура, за која термините за екстерните испити беа соопштени во ноември и ќе се полагаат од 29 мај до 14 јуни 2021.
Министерката Царовска укажа дека МОН има законска обврска да овозможи полагање на државната матура, зашто се пријавиле над 14 илјади матуранти, дека таа е услов за да продолжат со високо образование и е изборна, а оние што не сакаат да ја полагаат може да изберат училишна матура или стручен испит.