На средбата со претседателите на пратеничките групи во Собранието биле разгледувани законите што се во постапка, а за кои ќе има услови за второ читање да се разгледуваат на седницата што треба да се одржи следната недела
Во текот на изборната кампања, Собранието нема да има активности, со цел да се спречи евентуална злоупотреба на говорницата. Ова го соопштија од кабинетот на претседателот на Собранието во техничката влада, Јован Митрески, по одржаната денешна координативна средба во Собранието посочувајќи дека пратениците во Собранието ќе имаат активности до крајот на март годинава.
„Собранието ќе има активности до крајот на март имајќи предвид дека кампањата за претседателските избори почнува на 4 април, а потоа следува и кампања за пратеници за изборите на 24 април и 8 мај“,
велат од неговиот кабинет.
На средбата со претседателите на пратеничките групи во Собранието биле разгледувани законите што се во постапка, а за кои ќе има услови за второ читање да се разгледуваат на седницата што треба да се одржи следната недела.
„Седницата најверојатно ќе се одржи на 27 или на 28 март“,
соопштиле од кабинетот на спикерот Митрески.
Оттаму соопштија и дека се разговарало и за некои законски решенија кои се во постапка, а за кои е неопходно дополнително усогласување меѓу пратеничките групи.
На координатиовниот состанок не биле присутни претставници на ВМРО-ДПМНЕ.