Од ДЗС информираат дека пожарникарите во текот на целата ноќ интервенирале на гаснење на огнените јазици, а дека од 6 часот утринава се ангажирани повеќе екипи
Пожарот во Кавадаречко, што вчера беше реактивиран, е значително намален, но и натаму е активен – информираат утринава од Дирекцијата за заштита и спасување (ДЗС), посочувајќи дека пожарникарите во текот на целата ноќ интервенирале на гаснење на огнените јазици.
Од 6 часот утринава, посочуваат од ДЗС, се ангажирани повеќе екипи на два правци.
„На правецот од село Дреново кон Ќесендре интервенираат ЈП ‘Комуналец’ – Кавадарци со една цистерна, еден скип и двајца вработени, МВР со еден џип, еден пинцгауер и четворица вработени, ЈП ‘Национални шуми’ – подружница ‘Бор’ Кавадарци со еден камион, еден џип и четворица вработени и ТППЕ Кавадарци со два пинцгауери, една ‘лада нива’ и осум пожарникари“,
соопштија од ДЗС.
Кај кавадаречкото село Раец интервенираат ЈП „Комуналец“ – Кавадарци со една цистерна за вода, еден скип и двајца вработени, кавадаречката противпожарна единица со пет пожарникари и едно возило. На терен се активирани и четворица пожарникари од ТППЕ Неготино со еден џип, како и четворица вработени во МВР.