Со оглед на тоа што засега никој не го спори договорениот датум за избори – на 12 април, партиите би требало да ги достават кандидатските листи за пратеници во ДИК околу средината на март.
Набиена беше агендата на раководствата на најголемите партии во текот на денешниот ден, додека се одбројуваат на прсти деновите до распуштањето на деветтиот парламентарен состав. До тој чин, според најавите на претседателот на Собранието Талат Џафери, има само уште три работни дена, освен ако СДСМ не успее да издејствува уште неколку дена функционирање на законодавниот дом, за да се донесат законите што се поврзани со изборите или со евроатлантската агенда на земјата.
Пред самиот старт на предизборието, лидерот на ВМРО-ДПМНЕ Христијан Мицкоски денеска промовираше серија, главно економски и социјални, предлог-мерки, што најави дека ќе ги реализира ако дојде на власт. Додека во централата на ВМРО-ДПМНЕ траеше презентацијата на Мицкоски, партиските потпретседател Владо Мисајловски и генерален секретар Игор Јанушев беа на терен во базата.
Кандидати за пратеници
Мисајловски, кој неофицијално се споменува како носител на листата на ВМРО-ДПМНЕ во втората изборна единица, денеска беше на средба со граѓани во Бутел – една од општините во овој изборен регион. Јанушев, пак, беше во Виница, општина од третата изборна единица, за каде што се најавува дека е можно тој да биде носител на листа на ВМРО-ДПМНЕ.
Со оглед на тоа што засега никој не го спори договорениот датум за избори – на 12 април, партиите би требало да ги достават кандидатските листи за пратеници во ДИК околу средината на март. До среда, 12 февруари, за кога ВМРО-ДПМНЕ достави предлог за распуштање на парламентот, прашање е дали ќе биде донесен законот за јавно обвинителство. Дискутабилни станаа и измените на Изборниот законик, затоа што ДУИ инсистира на прекројување на изборните региони.
На терен денеска беше и лидерот на СДСМ Зоран Заев, и тоа во Арачиново – општината во која моментно владејачката партија прв пат има градоначалничка од своите редови. Заев направи увид во изградба на канализациска мрежа во Арачиново, каде што беше придружуван од техничкиот премиер Оливер Спасовски, потпретседателот на СДСМ Мухамед Зекири и министерот за транспорт и врски, Горан Сугарески.
Можни коалиции
На прашање во врска со можното проширување и модифицирање на коалицијата на СДСМ, Заев рече дека разговара со сите политички партии што ќе настапат на изборите. Доколку имаме заедничка програма и заеднички настап, ќе можеме заедно да ја добиеме честа и одговорноста да ја водиме извршната власт во иднина, рече Заев, одговарајќи дали би предложил предизборна коалиција со Беса.
„Има една убавина, кога ќе вложите во едно општество за сите, и кога ќе ги гледате граѓаните еднакви, тоа ви дава како лидер на партија слобода да одлучувате кој ќе влезе во коалиција. Јас сум добар пријател со сите, мојот политички субјект што е пријател со сите, соработувам со сите. Мицкоски, за негова жал, не може ни да помисли на соработка, поради национализмот кој што го негува“,
изјави Заев.
Мицкоски, слично како и Заев, вели дека разговараат со повеќе политички партии за коалицирање и дека помалите партии – нивни досегашни партнери веќе ја потврдиле коалицијата. Мицкоски тврди дека разговараат и со партии што сега се во коалиција со СДСМ. Лидерот на опозоцијата вели дека нема намера да преговара за пролонгирање на датумот за распуштање на парламентот. .
„ Јас сум сериозен човек и кога ќе постигнам договор – го почитувам. Договорот е на 12 февруари да се распушти Собранието,а на 12 април да имаме предвремени парламентарни избори. За мене тој договор е завршен. Тука немам никаква дилема, ниту, пак, имам намера да преговарам, ниту да вртам телефони, ниту да пристискам“,
рече Мицкоски.
За барањето на ДУИ за прекројување на изборните единици каде што е пречекорен законскиот праг, лидерот на опозицијата апелираше до сите политички партии да ја напуштата дневно -политичката агенда и да гласаат за измените согласно забелешките на ОБСЕ/ОДИХР.
– Ние разговаравме и преговаравме со СДСМ за измените во Изборниот законик. Околу едно имаме консензус – да се применат препораките од ОБСЕ/ОДИХР. Апелирам до сите политички партии да го напуштат оној дневно- политички театар кој што го прават и едноставно да покажат зрелост. Да влезат во парламентот и тоа што е препорака на ОБСЕ/ОДИХР, за да имаме колку толку кредибилен процес, да го поддржат без какви било условувања“,
рече Мицкоски.