Лидерот на ВМРО-ДПМНЕ презентираше денеска серија мерки, главно од економијата и социјалата, како дел од партиската „Обнова“. За наредниот период најави нови прес-конференции на кои ќе ги претстави идеите што би ги реализирал ако дојде на чело на владата
Серија мерки како дел од „Обновата“ на ВМРО-ДПМНЕ промовираше денеска, на прес-конференција, опозицискиот лидер Христијан Мицкоски. Тој најави и други прес-конференции во наредниот период, на кои ВМРО-ДПМНЕ ќе ги претстави своите идеи како дел од партиската изборна програма.
„Почнуваме серија на прес-конференции на кои ќе промовираме мерки и решенија кои ќе бидат дел од обновата која доаѓа, а кои ќе овозможат повеќе за секого. Тоа се мерки и проекти кон кои се обврзуваме и кои ќе треба да донесат повеќе пари, повеќе средства, повеќе надеж, повеќе насмевки. Повеќе за пензионерите, повеќе за работниците, повеќе за стопанството и бизнисот, повеќе за граѓаните и стандардот, повеќе за Македонија“,
рече Мицкоски
Кои се предлог-мерките на ВМРО-ДПМНЕ
– Зголемување на просечна плата во државата за минимум 2 проценти во еден мандат. Според Мицкоски, платите ќе пораснат за минимум 25 отсто во следните четири години. Тоа ќе значи повеќе пари за работниците или во просек за 6.500 денари повеќе од просечната плата во државата во декември 2019 година.
– Зголемување на просечната пензија за минимум 20 проценти во еден мандат или повеќе од 3.000 денари за секој пензионер. Мицкоски најави дека во првите 100 дена потенцијалната влада на ВМРО-ДПМНЕ ќе го промени Законот за пензиско и инвалидско осигурување и согласно новото законско решение пензиите ќе се прилагодуваат во двата основа, порастот на трошоците за живот и со просечниот раст на нето платите.
– Невработеност под 10 отсто. Мицкоски ветува едноцифрена невработеност и повеќе работни места.
– Нула проценти персонален данок за млади до 29 години. Ова ќе значи ослободување од персонален данок за вработување на млади до 29 години кои имаат годишен нето приход до 6.5 илјади евра.
– Пониски даноци и рамен данок до 8 проценти. Ќе стартуваме, вели Мицкоски, од 10 отсто од кои ќе има намалување за 1 процент во првите 100 дена.
– Нов модел на индустриjализација, кој би значел и зголемување на извозната конкурентност на македонската економија. За таа цел, Мицкоски најави и мерки за поддршка на домашните компании во нивното технолошко и организациско унапредување; изградба на мрежа на извозни промотори за домашните извозни компании и промотори за привлекување на странски директни инвестиции; реформа на Македонската банка за поддршка на развојот во Македонско извозно развојна банка, која ќе обезбеди поволни кредити и извозна поддршка за домашните компании и субвенционирана камата за развој…
– Четири милијарди евра домашни и странски инвестиции за еден мандат. Ова, според Мицкоски, значи повеќе поддршка од државата за домашната економија и компании и привлекување на странски директни инвестиции преку реформиран модел кој ќе биде привлечен за светски големи компании.
– Раст на БДП за минимум 4% годишно. Се обврзуваме, рече Мицкоски, за обнова која ќе донесе повеќе пари за бизнисот, помалку давачки и бирократија. Ова, нагласи, значи и намалување на парафискални давачки за фирмите.
– Реализација за повеќе од 90 проценти на планираните капитални државни инвестиции годишно. Тоа, како што рече Мицкоски, подразбира повеќе работа во градежништвото, повеќе работа во трговијата и повеќе бизнис за претприемачите.
„На крајот, за да имаме подобра бизнис клима, мора да го подобриме економскиот рејтинг на државата, што подразбира не само економски и институционални мерки, туку и борба против корупцијата и криминалот. Затоа се обврзуваме Македонија да се искачи во „Топ 10“ на листата на „Дуинг бизнис“. Се обрзуваме Македонија да влезе во првата третина на листата на Светскиот економски форум „Давос“ за најразвиени економии. Се обрзуваме Македонија да влезе во првата четвртина на листата на „Форбс“ ,
рече Мицкоски