„Работиме со намален интензитет. Ако претходно сме оперирале дневно, да речеме, на Клиниката за ортопедија по околу 15 случаи, сега во една сала во две смени може да поставиме максимум седум до осум случаи и предност имаат пациенти со малигни заболувања, како и фрактури, но, секако, се оперираат и пациентите кои се на елективната листа“, вели медицинскиот директор на ТОАРИЛУЦ
Со обезбедените надворешни компресори досега на Универзитетската клиника за трауматологија, ортопедски болести, анестезија, реанимација и интензивно лекување и ургентен центар (ТОАРИЛУЦ) се изведени околу 70 хируршки зафати, изјави денеска медицинскиот директорот на оваа Клиника, Александар Трајковски.
Дополнително, тој изрази увереност дека работите на Клиниката полека ќе се враќаат во нормала по проблемот со снабдувањето на хируршките сали во Клиничкиот центар „Мајка Тереза“ со компримиран воздух од централната компресорска станица поради ширење на непријатен мирис.
Како што информира Трајковски, клиниката чиј директор е, располага со шест операциони сали од кои две се на Трауматологија, а четири на Клиниката за ортопедски болести, додавајќи дека работат со намален интензитет.
„Со обезбедувањето на надворешните компресори, досега изведени се некаде околу 70 оперативни зафати. Половина на Клиниката за трауматологија, половина на Клиниката за ортопедија. Работиме со намален интензитет. Ако претходно сме оперирале дневно, да речеме, на Клиниката за ортопедија по околу 15 случаи, сега во една сала во две смени може да поставиме максимум седум до осум случаи и предност имаат пациенти со малигни заболувања, како и фрактури, но, секако, се оперираат и пациентите кои се на елективната листа на чекање“,
изјави тој, пренесува МИА.
Според него, листи на чекање за операции имало и претходно, пред да се појави проблемот со хируршките сали во Клиничкиот центар „Мајка Тереза“ во Скопје, изразувајќи оптимизам дека состојбите ќе се враќаат во нормала.
Заменик-министерката за здравство Маја Манолева завчера информира дека надворешни компресори и садови со компримиран воздух ќе бидат доставени до секоја од хируршките клиники и дека тие ќе можат да почнат со работа според наредбата што ја добиле во понеделникот.
„Разговаравме и околу организацијата на работата на хируршките клиники. Имено, со наредбата што ја добија хируршките клиники, беа задолжени да организираат работа во две смени со цел да се продолжи периодот на интервенции во една сала, затоа што имаме ограничен број надворешни компресори кои може да ги користат операционите сали“,
изјави во вторникот Манолева.
Таа кажа и дека било договорено, на пример, да работи една наместо две операциони сали, но во две смени, со што практично би го добивале речиси доволниот капацитет на хируршките сали.
Исто така, Манолева соопшти дека на состанокот побарала од директорите да доставуваат извештаи за сработени итни, елективни интервенции, кои се направени на секоја од клиниките посебно.
Хируршките сали во Клиничкиот центар во Скопје од 18 мај се затворени, а како причина за тоа е наведен непријатниот мирис што се ширел во нив. Мостри од воздухот се испратени на анализа во Германија, а случајот со појавата на мирисот го истражува и Јавното обвинителство кое треба да утврди дали во него евентуално има елементи на сторено кривично дело.