Градскиот комитет на СНС од Нови Сад изјави дека во еден од најважните моменти од поновата српска историја му дава целосна поддршка на Вучиќ во водење политика која, како што велат, ќе обезбеди конечен мир во областите на Косово и Метохија, а во исто време да го заштити српскиот народ и светите места од понатамошен погром
Повеќе градски и општински комитети на СНС денеска соопштија дека му даваат целосна поддршка на претседателот на Србија, Александар Вучиќ, во, како што наведоа, борбата за одбрана на националните и државните интереси, територијалниот интегритет и решавањето на косовското прашање, јавува Радио телевизија Војводина (РТВ). Ова доаѓа по синоќешната вест дека Вучиќ им рекол на сопартијците дека ќе се повлече од позицијата претседател откако претходно на средба со најблиските соработници во седиштето на партијата имало несогласувања и повици да се отфрлат преговорите со САД и ЕУ.
Градскиот комитет на СНС од Нови Сад изјави дека во еден од најважните моменти од поновата српска историја му дава целосна поддршка на Вучиќ во водење политика која, како што велат, ќе обезбеди конечен мир во областите на Косово и Метохија, а во исто време да го заштити српскиот народ и светите места од понатамошен погром.
„Прогресивците на Нови Сад ги повикуваат сите актери на српската политичка сцена, во овој критичен момент, кога Србија и нејзиниот претседател се под притисок од сите страни со неверојатни уцени, да застанат под исто знаме и да покажат единство што ќе му покаже на светот колку за српскиот народ значи јужната покраина. Борбата за мир и територијален интегритет на Србија на чело со претседателот Вучиќ се најголем национален интерес и тој не смее да биде сам во тоа“,
се вели во соопштението на тој Градски комитет.
Вучиќ е поддржан и од Градскиот комитет на СНС Сомбор, кој констатира дека Србија е на пат кон просперитет во последната деценија, дека работи и гради, а сето тоа, како што велат, е благодарение на политиката што ја води претседателот Александар Вучиќ и Српската напредна партија.
„Сведоци сме на постојаните напади на оние кои сакаат да ја видат Србија на дното и ја изразуваме нашата сигурност дека само со претседателот Вучиќ нашата земја може да ги зачува мирот и стабилноста, а се друго би било најлошото сценарио за неа. Во овие особено тешки денови кога се очекува одговорот на Србија во однос на решавањето на прашањето за Косово и Метохија, сигурни сме дека само претседателот Александар Вучиќ може да го донесе вистинското решение“, се вели во соопштението.
Градскиот комитет на СНС во Јагодина на чело со претседателот и пратеник Никола Радосављевиќ во соопштение наведува дека последиците за државата доколку Вучиќ се повлече од функцијата претседател на државата и партијата ќе бидат големи.
„Затоа бараме од претседателот Вучиќ да остане на маргините на својата татковина, бидејќи никој не ја знае и не може да ја води Србија подобро и похрабро од него во овие, за Србија, најтешките времиња во поновата историја. Неговото заминување би значело крај на надежите и аспирациите на милиони луѓе во Србија, кои со своите гласови му го дадоа мандатот да ги води државата и народот и во добро и во лошо“,
се наведува во соопштението.
Поддршка на Вучиќ му дадоа и Општинскиот комитет на СНС Ковачица, Општинскиот комитет на СНС Раковица и Општинскиот одбор на СНС Књажевац.
Претходно пратеничката на СНС, Сандра Божиќ, преку својот профил на Инстаграм, го повика претседателот на Србија Александар Вучиќ да не поднесува оставка бидејќи, како што напиша, тој бил единствениот способен да ја води и да ја зачува Србија.
Вучиќ денеска ќе присуствува на седница на Владата на Србија. Според најавите, тој вечерва треба да им се обрати на граѓаните на Србија по разговорите во петокот со претставниците на ЕУ и на САД и изјавата дека Србија е подготвена да го прифати концептот на европскиот план за нормализирање на односите со Косово.
Во петокот, по средбата со претставниците на САД и ЕУ, Вучиќ рече дека Србија е подготвена да го прифати концептот на европскиот план и да работи на имплементација на предложениот договор за дијалогот за нормализација на односите со Косово, што беше потврдено и од претставникот на ЕУ, Мирослав Лајчак.
Словачкиот дипломат и специјален претставник на ЕУ за дијалогот меѓу Белград и Приштина, Лајчак, оцени дека Вучиќ покажал одговорен пристап и подготвеност да носи тешки одлуки во интерес на мирот и европската перспектива на Србија.