Времетраењето на протестот не е утврдено бидејќи се планира да трае до исполнување на барањата на приватните превозници вклучени во Јавниот линиски превоз кои велат дека ако брзо не се решат нивните барања во наредните денови блокадата ќе се прошири и на други делови од сообраќајниците во Скопје
Приватните превозници вклучени во Јавниот линиски превоз денеска од 7:00 часот со повеќе од 30 автобуси протестираат со целосно блокирање во сите правци на крстосницата кај „Мавровка“, односно булеварот „Гоце Делчев“ и булеварот „Крсте Петков Мисирков“. Од приватниот градски автобуски превозник „Слобода превоз“ велат дека не е утврдено времетраењето на протестот бидејќи се планира да трае до исполнување на нивните барања.
Оттаму најавуваат дека ако брзо не се решат нивните барања во наредните денови блокадата ќе се прошири и на други делови од сообраќајниците во Скопје. Во рамките на активностите за решавање на актуелниот проблем денеска „Слобода превоз“ треба да оствари средба со Упрваниот одбор на ЈСП, а исто така претставници на приватните превозници ќе присуствуваат и на седницата на Советот на Град Скопје.
Поради најавениот протест, СВР Скопје од 7 часот утрово презема мерки за посебен режим на сообраќајот на двата булевара и околните улици. МВР апелира до граѓаните да ги почитуваат наредбите што ги издаваат полициските службеници.
„На средбата со УО на ЈСП ќе побараме информации поврзани со долгот на ЈСП-Скопје и зошто директорот не ги исполнува обврските од договорот, како и информации за изнесените невистини од страна на градоначалникот за наводен криминал со билетите за превоз и кражба на пари, кои одговори секако дека ги имаат службите на ЈСП, бидејќи тие се најинволвираните, задолжени и компетентни во целиот процес од набавка , дистрибуција до продажба на билети и за функционирање на АВЛ системот и системот за наплата. Тие како такви точно знаат за тоа каква е вистинската состојба и документација во овој процес наспроти „Слобода превоз“ која нема никаква ниту улога во тој процес и нема никаков пристап до тие податоци. Јавноста не смее да биде дезинформирана особено за состојби за кои постојат записи, аргументи и факти“,
посочија вчера во соопштение до медиумите од „Слобода превоз“.
Инаку, во петокот приватните превозници добиле ветување од Советот на Град Скопје дека ќе стори сѐ што е во негова надлежност за да се надмине проблемот со кој се соочуваат превозниците.
Претседателот на Здружението на приватни превозници „Слобода превоз“, Ленин Јовановски, во изјава за медиумите дадена по средбата со советниците на Град Скопје во петокот, рече дека автобусите на приватните превозници нема да возат сѐ додека не се реши проблемот.
„Целта на оваа средба е постигната. На следната седница што ќе се одржи во понеделник преку советнички прашања ќе побараме одговори на се она што ние не можеме да го добиеме. Советот во рамки на неговите надлежности ќе направи се за надминување на оваа состојба. Добро е што сите претставници на советниците сакаат да се реши ова“,
изјави Јовановски.
Минатата недела приватните превозници не сообраќаа поради неисплатениот долг од Јавното сообраќајно претпријатие кон нив. Градоначалничката на Град Скопје Данела Арсовска минатата недела ги обвини приватните превозници дека од 2017 година наплаќале билети и парите не ги пријавувале, а фактурирале по 400 илјади евра од ЈСП секој месец. Во демантот на таквите обвинувања, превозниците порачаа дека воопшто не се вклучени во наплатата на билети.
Од „Слобода превоз“ додаваат дека „во врска со клеветите и долгот, во текот на неделата преку адвокатската канцеларија Апостолски, ќе бидат доставени потребните поднесоци до надлежните институции“.
Автобусите на приватниот превозник „Слобода превоз“, на линиите 9, 12, 22, 23 и 45, не сообраќаа поради немање средства за нафта затоа што ЈСП Скопје, односно Град Скопје не го исплатил долгот кон компанијата, а потоа беа исклучени и приградските линии 11, 11а, 47, 55, 61, 63 и 73.