Понудата на „Дермалог“, според извори на „360 степени“, била избрана без предвидената електронска аукција, бидејќи за останатите три понуди било оценето дека не ги исполнуваат сите услови
Договорот меѓу СДСМ и ВМРО-ДПМНЕ од следните избори да се гласа со отпечаток од прст ќе ги поскапи претстојните локални избори за 11,2 милиони евра (688 милиони денари). Толку пари, дознава „360 степени“, изнесува понудата на германската компанија „Дермалог“, која беше избрана како најдобра на тендерот за набавка на систем за биометриска идентификација на гласачите.
Дознаваме и дека крајната цена е иста со цената од понудата, бидејќи иако со јавната набавка беше предвидена аукција, таа не се одржала. Причината е што иако имаше четири пријавени компании, само „Дермалог“, според оценките на комисијата за јавни набавки во ДИК, ги исполила сите услови, па не останал никој друг за да се натпреварува во негативно наддавање со кое потенцијално би се спуштила цената. Понудата на „Дермалог“, сепак, била најниска во споредба со останатите и е во рамките на планираната вредност на опремата – 11,7 милиони евра (720 милиони денари).
Претседателот на Државната изборна комисија, Александар Даштевски, денеска одржа прес-конференција, но не даде детален одговор – зошто токму „Дермалог“ е избрана за најдобра. Притоа, не спомна и дека останатите понудувачи не ги исполниле условите на тендерот.
„Вчера беше избрана компанија која ќе ја обезбеди техничката опрема за спроведување на изборите со отпечаток на прст. На 1 јули заврши постапката по јавната набавка за биометриска индентификација на гласачите со отпечатоци од прст и се пријавија четири компании. Евалуацијата на компаниите заврши вчера и по завршување на постапката Комисијата за јавни набавки ми предложи една компанија за која донесов одлука да биде избрана. Таа одлука е ставена на интернет-страницата на Бирото за јавни набавки. ‘Дермалог’ од Германија, таа компанија е избрана со евалуација, ги исполнила условите, била најдобра, имала најдобра понуда, најдобар апарат, затоа предлогот го прифатив како веродостоен“,
изјави Даштевски.
„360 степени“ го побара претседателот на Државната изборна комисија и попладнево. Побаравме официјален став – колку чини понудата на „Дермалог“, дали имало аукција и какво претходно искуство има „Дермалог“, бидејќи тоа беше клучен услов во тендерската документација. Ни возврати дека не може да одговори на овие прашања додека не помине постапаката за жалба, бидејќи дури тогаш одлуката би стапила на сила.