Претседателот на Државната изборна комисија (ДИК), Александар Даштевски, вели дека германската фирма „Дермалог“ е избрана за набавка на терминалите за „читање“ на отпечатоци од прст, оти имала најдобра понуда, ги исполнила условите и дека имала најдобри апарати.
„Вчера беше избрана компанија која ќе ја обезбеди техничката опрема за спроведување на изборите со отпечаток на прст. На 1 јули заврши постапката по јавната набавка за биометриска индентификација на гласачите со отпечатоци од прст и се пријавија четири компании. Евалуацијата на компаниите заврши вчера и по завршување на постапката Комисијата за јавни набавки ми предложи една компанија за која донесов одлука да биде избрана“,
информираше Даштевски.
Одлуката, како што кажа, е ставена на веб-страната на Бирото за јавни набавки.
„Сега трае рокот за жалба, што трае десет дена. До завршување на тој рок, продолжува постапката. Се надевам дека ќе заврши и тоа како што треба, бидејќи тоа не е во наша надлежност и дека сме еден чекор поблиску до остваруање на нашето мото еден гласач – еден глас“,
кажа тој.
Даштевски појасни дека врз основа на тоа што го видел од извештајот на Комисијата, таа компанија ги исполнила условите, имала најдобра понуда, и најдобри апарати.
„Поради тоа предлогот го прифатив како веродостоен“,
рече Даштевски.
Во однос на заштитата на личните податоци на гласачите, претседателот на ДИК кажа дека гаранциите за тоа се предвидени во тендерот и може да се прочитаат во спецификацијата.
„Податоците ќе се внесат од страна на МВР и после ќе се вратат назад така што не можат да бидат злоупотребени бидејќи ние не купуваме компанија, купуваме опрема. Опремата е во наша сопственост“,
уверува Даштевски.
Рокот за достава на техничката опрема е 60 дена. Даштевски смета има време до крај на септември за да стигне опремата во пресрет на локалните избори.
„Испораката ќе биде на два пати. Првиот пат ќе биде околу пет отсто, некаде околу 200 апарати и ќе биде извршена обуката. И после тоа остатокот само да се наполни, за што ќе гтреба неколку дена. Повторно не би зборувал зошто не е завршена постапката“,
рече Даштевски.
Во однос на деталите околу чувањето и дистрибуцијата на опремата ДИК ќе донесе Уредба.
Набавката на терминалите за „читање“ на отпечатоци од прст се прави во пресрет на претстојните локални избори кои треба да се одржат во втората половина на октомври. Така се договорија лидерите на двете најголеми политички партии, СДСМ и ВМРО-ДПМНЕ.
Првиот тендер за набавка на опремата пропадна. Официјално, поради грешки во тендерската документација. Неофицијално, како што веќе објави „360 степени“, поради фаворизирање на една компанија.
На повторениот тендер за набавка на интергрираниот систем се пријавија четири компании.
На денешната прес-конференција, првиот човек на ДИК кажа и дека во тек е и јавна набавка за апликација за текот на гласање и за првични и неофицијални резултати од изборите.