Државната изборна комисија (ДИК) денеска изврши избор на компанијата што треба да го набави интегрираниот систем за биометриска индентификација на гласачите, јави МИА. Според најавите, повеќе информации во врска со набавката на овој систем и подготовките за локалните избори Комисијата ќе соопшти во текот на утрешниот ден.
„360 степени“ дознава дека изборот паднал на германската компанија „Дермалог“.
Набавката на терминалите за „читање“ на отпечатоци од прст се прави во пресрет на претстојните локални избори кои треба да се одржат во втората половина на октомври. Така се договорија лидерите на двете најголеми политички партии, СДСМ и ВМРО-ДПМНЕ.
Првиот тендер за набавка на опремата пропадна. Официјално, поради грешки во тендерската документација. Неофицијално, како што веќе објави „360 степени“, поради фаворизирање на една компанија.
На повторениот тендер за набавка на интергрираниот систем се пријавија четири компании.
Претседателот на Комисијата Александар Даштевски на 2 јули за МИА изјави дека системот и терминалите за вчитување на отпечатоци од прсти ќе бидат навреме набавени за локалните избори. Идентитетот на гласачите на локалните избори за првпат ќе се проверува со терминали за отпечатоци од прсти, нешто што беше предвидено со последните измени на Изборниот законик.
Даштевски тогаш рече исто така дека очекува локалните избори да бидат распишани од страна на претседателот на Собранието на почетокот на август.
Државната изборна комисија (ДИК) и општинските изборни комисии денеска започнаа со избор на членови на избирачките одбори за претстојните локални избори. Редоследот на изборот, според информациите од Комисијата, е според големината на општините. Предвидено е изборот на членовите на избирачките одбори да заврши следната недела. Се бираат комплетно нови избрачки одбори, бидејќи на старите им истече мандатот.