Далечинското гласање на членовите на шпанскиот сенат, иако е предвидено како можност, ќе се случи првпат во историјата и тоа токму за ратификација на Пристапниот протокол за Северна Македонија во НАТО
Седницата на Сенатот на Шпанија на 17 март, со единствена точка на дневниот ред – ратификација на Пристапниот протокол за Северна Македонија во НАТО, ќе има комбиниран карактер. Членовите што се во можност ќе бидат присутни во пленарната сала на Сенатот, а оние што нема да можат поради коронавирусот, ќе учествуваат и ќе гласат преку видео-конференција.
Ова пред малку го објави претседателката на Сенатот, Марија Пилар Лоп Куенса.
Можноста за далечинско изјаснување е дел од легислативата со која се регулира работата на шпанскиот сенат.
Совладувањето на последната пречка за официјализирање на членството на Северна Македонија во НАТО висеше откако на почетокот на оваа недела шпанскиот сенат донесе одлука да ги суспендира сите активности во следните седум дена.
*поврзана вест Димитров: Сенатот на Шпанија одлучи на 17 март да гласа за приемот на Северна Македонија во НАТО
Откако Протоколот за членство на Северна Македонија во НАТО ќе биде изгласан во Сенатот, документот ќе треба да го потпише шпанскиот крал, а потоа и да биде депониран во Стејт Департментот во Вашингтон. Со предавање на ратификацискиот инструмент од Северна Македонија, исто така, во Стејт Департментот и формално ќе заврши процедурата, со што Северна Македонија ќе стане 30. членка на Алијансата.