Министерот за надворешни работи, Никола Димитров, пред малку на „Фејсбук“ објави:
„И покрај кризата околу корона вирусот и суспендирањето на сите други активности, Сенатот на Шпанија пред малку одлучи на 17 март да одржи пленарна седница со единствена точка на дневен ред: Ратификација на Пристапниот протокол за членство на Северна Македонија во НАТО!“
На почетокот на оваа недела шпанскиот Сенат ги суспендираше сите предвидени активности во наредните седум дена. Причина за оваа одлука беше заштита од коронавирусот, кој беше откриен кај генералниот секретар на ултра-десничарската партија Вокс, кој инаку е член на Конгресот.
Откако Протоколот за членство на Северна Македонија во НАТО ќе биде изгласан во Сенатот, документот ќе треба да го потпише шпанскиот крал, а потоа и да биде депониран во Стејт Департментот во Вашингтон. Со предавање на ратификацискиот инструмент од Северна Македонија, исто така, во Стејт Департментот и формално ќе заврши процедурата, со што Северна Македонија ќе стане 30. членка на Алијансата.