Бројот на новозаразени лица во кинескиот финансиски центар е во „константен надолен тренд“ од 22 април, изјави заменик-градоначалникот на Шангај, Ву Квинг
Властите во Шангај објавија дека успешно е спречена најлошата појава на инфекција со коронавирус, по едномесечен карантин за околу 25 милиони луѓе, и ветија дека ќе ја задржат стратегијата за нулта толеранција на ковид, и покрај економските последици, пренесува Ројтерс.
Бројот на новозаразени лица во кинескиот финансиски центар е во „константен надолен тренд“ од 22 април, изјави заменик-градоначалникот на Шангај, Ву Квинг.
„Во моментов превенцијата од епидемијата и контролата на состојбата во нашиот град постојано се подобруваат, а епидемијата е ставена под ефективна контрола“,
рече тој на прес-конференција.
Од вкупно 25 милиони граѓани, многумина сè уште се под рестрикции и се револтирани од мерките, кои се во сила веќе втор месец, а се спроведуваат како дел од пристапот на Кина за нулта ковид.
Сепак, заменик-градоначалникот на Шангај претпазливо рече дека постои ризик од враќање на инфекцијата и градот нема да се откаже од стратегијата за „динамично чистење“.
„Не можеме да се опуштиме, упорноста е победа“,
нагласи Ву Квинг.