Заразеното 15-месечно дете престојувало во градинка само еден час на 9 септември, а вчера попладне родителите ја известиле градинката дека, покрај цело семејство, и детенцето е позитивно на ковид-19, соопшти министерката
Беспредметно е останувањето дома на родителите на деца од предучилишна возраст и на родилките по отворањето на градинките, изјави денеска министерката за труд и социјална политика Јагода Шахпаска, дообјаснувајќи ја одлуката на Владата, според која, родителите на деца до 6 години се враќаат на работа на 23 септември.
На 9 септември, потсети Шахпаска, почнаа да работаат градинките и центрите за ран детски развој. Овие установи, како што посочи, почнаа да работаат согласно со Протокол, кој јасно ги дефинира условите за безбеден престој на децата во градинките и кој го сведува ризикот од зараза од ковид-19 на минимум.
Шахпаска рече дека дека во градинките има простор за сместување на 19 000 деца, а интерес за сместување пројавиле родители на 14 555 деца. Според тоа, во градинките се слободни 4 500 места.
„Приоритет имаа деца на самохрани родители и оние чии двајца родители се вработени. Оттука, потребата на овие родители да не одат на работа по отворањето на градинките е беспредметна. Затоа Владата вчера јасно ја дефинираше одлуката дека родителите на овие деца треба да се вратат на работа“,
нагласи министерката.
Владината одлука за враќање на повеќето вработени лица на работните места предизвика многу реакции во јавноста, посебно на социјалните мрежи. Атмосферата дополнително зовре откако МТСП информра денеска за прв случај на ковид-19 кај дете во градинка – во скопската општина Центар.
Сепак, Шахпаска рече дека се инцидентни случаите на појава на ковид-19 во неколку предучилишни установи, каде што имаше заразени негувателки.
„Заразеното 15-месечно дете престојувало во градинка само еден час на 9 септември. Следните денови родителите не го донеле. На прашање од вработените во градинката зошто детето отсуствува, добиле информација дека се работи за вадење на запчиња и затоа детето е отсутно од градинката. Вчера на 14 септември, околу 16 часот, родителите ја известиле градинката дека, покрај цело семејство, и детенцето е позитивно на ковид-19“,
соопшти Шахпаска.
Согласно насоките на здравствените власти, вклучена е и епидемиолошката служба, ставени се во изолација сите во групата во која било сместено детето, како и воспитувачот и негувателот, согласно со Протоколот и направена е вонредна дезинфекција на градинката.
Шахпаска нагласи дека државата мора да функционира и системот мора да работи, а, според проценките на здравствените власти, најмалку ризична група се децата и тие треба да се вратат во градинка.
Владата, како што рече министерката, ја следи состојбата, а во МТСП е формирана Комисија составена од вработени за детска заштита, но и инспектори, кои одат на терен и ја следат состојбата во градините, во однос на тоа дали се почитуваат протоколите за заштита.
–