Вработената во светиниколската детска градинка „Рахилка Гонева“, клон 1 е позитивна на ковид-19, покажаа резултатите од тестирањето, кое е спроведено откако таа пријавија симптоми на коронавирусот. Поради тоа, оваа градинка, каде се запишани 110 деца, не беше отворена неделава.
Градоначалникот на општина Свети Николе, Сашо Велковски за МИА потврди дека вработената, која е од техничкиот персонал која учествувала во подготовка на приемот на дечињата, во понеделникот пријавила симптоми на ковид-19.
„Резултатот од тестирањето е позитивен, со што се потврди исправноста на нашата одлука оваа градинка да не започне со работа. Уште денеска е извршено вонредно дезинфицирање на сите простории и дворот во градинката од страна на Центарот за јавно здравје – Велес“,
рече Велковски.
Раководството на градинката очекува епидемиолошките и другите надлежни служби да дадат комплетна епидемиолошка слика, по што би започнала со работа оваа градинка.
Министерстството за труд и социјална политика претходно потврди дека вработи во градинка во Битола и во Скопје, исто така се позитивни на коронавирус. Во случајот во Битола, деца и вработени се во изолација, додека во Скопје, заболената воопшто не била на работа од 9 септември кога градинките повторно почнаа со работа.