Од Синдикатот на УПОЗ велат дека не отстапуваат од нивните барања за 78 отсто зголемување на платите и враќање на додатоците на плата за вработените во јавнообвинителската и судската служба
Синдикатот на УПОЗ и Владата денеска седнаа на заедничка маса за да се договорат околу барањата што ги имаат вработените во јавнообвинителската и судската служба. Но, на средбата, како што информираа од Синдикатот на УПОЗ, не добиле конкретен предлог од страна на владините претставници.
„Одговор на нашите барања конкретен не добивме. Очекуваме тоа да биде наредната недела и кога ќе добиеме понуда, таа ќе ја пренесеме на нашето членство кое ќе одлучи понатаму дали ќе ја прифати или не и дали ќе продолжиме со штрајкот“,
изјави претседателот на Синдикатот на УПОЗ, Трпе Деаноски, по средбата во Владата.
Додека да добијат конкретен предлог, Деаноски вели дека штрајкот ќе продолжи и оти ќе се работат само итните предмети.
Од Синдикатот на УПОЗ велат дека не отстапуваат од нивните барања за 78 отсто зголемување на платите и враќање на додатоците на плата за вработените во јавнообвинителската и судската служба.
Покрај за барањата, како што посочи Деаноски, разговарале и за висината на моменталните плати.
„Се договоривме наредната недела да се достават уште неколку податоци, особено за судовите. Тоа ќе го направи Министерството за финансии. Ќе се сретнеме во вторник или во среда уште еднаш за да видиме дали од спротивната страна ќе добиеме конкретна понуда за нашите барања“,
нагласи Деаноски и додаде дека побарале разговорите да завршат за десетина дена.
За средбата со Синдикатот од Владата информираа со соопштение во кое се вели дека состанокот се одржал во насока на пронаоѓање на заемно прифатливо решение во однос на одредени состојби во судската и јавнообвинителската служба, посочени од страна на Синдикатот на УПОЗ.
„Работната група ги сослуша барањата на претставниците на Синдикатот на УПОЗ, при што истакна подготвеност, низ дијалог да се дојде до системско и одржливо решение на посочените состојби во судската и јавнообвинителската служба, сè со цел да се овозможи непречено функционирање на правосудниот систем“,
се наведува во соопштението од владината прес-служба.
Од Владата велат дека сите учесници на средбата изразиле подготвеност за понатамошно продолжување на дијалогот и доаѓање до системско, праведно, правично и солидарно решение, а кое ќе биде во функција на унапредување на работата на судската и јавнообвинителската служба и додаваат дека наредниот работен состанок ќе се одржи наредната среда, на 1 ноември.
Синдикатот на работниците од управата, правосудните органи и здруженијата на граѓани (УПОЗ) изминатиот период излегоа на протести и побараа покачување на платите за 78 отсто и враќање на додатоците на плата.
Од УПОЗ порачаа дека со исполнување на нивното барање за зголемување на платата за 78 проценти, никој од вработените нема да ја надмине просечната плата, туку само ќе се доближи до неа. Со покачување од 78 отсто, како што рекоа, просечната плата на судската администрација ќе биде околу 24 000 денари.