Во предзиборната програма на ВМРО-ДПМНЕ, во поглавјето „Интегрирана, стабилна и безбедна земја“, пишува дека за ВМРО-ДПМНЕ членството на Македонија во ЕУ и НАТО е заокружување на македонската државност и отпочнување на процес на меѓународна афирмација на македонската култура, јазик и посебност. Но, само малку подолу, за договорите кои го овозможија влезот во НАТО и стартот на преговорите со ЕУ, се вели:
„Во таа насока, надворешен политички приоритет ќе биде запирање и попречување на сите идни иницијативи кои се започнати по националното понижување за проширување, продлабочување и лично интерпретирање на договорите потпишани од Заев и Димитров.“
(Страна 208 и 209 во Програмата)
Веднаш потоа, на следните страници пишува дека „Владата предводена од ВМРО-ДПМНЕ целосно ќе се заложи за задржување на перспективата за полноправно членство на Македонија во ЕУ“.
Со оглед на фактот дека членството на Македонија во НАТО и преговорите со ЕУ немаше да бидат возможни без договорите со Грција и со Бугарија, побаравме појаснување: дали ова значи дека доколку ВМРО-ДПМНЕ дојде на власт, ќе ја продолжи имплементацијата на двата споменати договора или ќе работи на нивно поништување?
Од партијата одговорија кусо:
„Нашиот став за Преспанскиот договор е јасен и повеќе пати соопштуван, исто како и за договорот со Бугарија не би имале што повеќе да додадеме.“