По вчера изгласаната недоверба од Централниот одбор на ДОМ за двајца потпретседатели на партијата – Ана Петровска (актуелна директорка на Државниот инспекторат за животна средина) и Мирослав Богдановски (пратеник во Собранието), „360 степени“ праша што ќе биде со нивните државни позиции на кои дојдоа како резултат на тоа што ДОМ е дел од коалицијата предводена од СДСМ.
Мирослав Богдановски е еден од пратениците кој во Собранието дојде во скафандер за гласање на петтиот пакет економски мерки. Неговиот глас е еден од 62 од тенкото парламентарно мнозинство. Тој за „360 степени“ изјави дека останува лојален на владејачкото мнозинство, но дека ќе дејствува независно од неговата матична партија.
„Останувам во мнозинството со поддршка на оваа влада. Гледате како вчера се случи тоа што се случи. Во таа партија владее тортура врз членовите што имаат различно мислење од претседателката, така што моето дејствување ќе биде како независен, не можам да ги претставувам тие луѓе. Ние сме дел од тој ДОМ што веќе не постои како демократска партија. Вчера Централниот одбор на партијата беше свикан за предлогот за вонреден конгрес. Со тоа првично им се даде легитимитет на собраните потписи за вонреден конгрес, но на шверцерски начин, луѓе што не се дел од Централниот одбор, а се претставуваат така, го сменија дневниот ред и вметнаа точка – гласање доверба. Затоа го напуштивме состанокот, немавме легитимитет да менуваме дневен ред и да менуваме точки. И сега на иницијаторите на тој предлог како награда им е изгласана недоверба“,
вели Богдановски.
Тој потврдува дека во ДОМ има превирања подолго време, а барањето за вонреден конгрес било за да се слушнат различните мислења во партијата.
„Ние не се боревме ни за позиции ни за претседатели, сакавме да воведеме копретседателство, ротирачко, за секој да може да учествува во раководење со таа партија. Со ротација на шест месеци ние ќе изберевме двајца копретседатели, а заведен ќе биде еден“,
уверува Богдановски.
Морачанин вели дека внатрепартиските работи никако не може да се доведат во корелација со државните функции.
„Ова е внатрепартиска работа. Да ги раздвоиме партиските од државните функции. Доколку директорката на ДИЖС си ја извршува работата, нема потреба од разрешување. Има кој да ги процени резултатите од нејзиното работење, ние како партија нема да бараме нејзино разрешување. Како ќе дејствува пратеникот во Собранието, не знам“,
вели Морачанин.
Претседателката на ДОМ ги негира тврдењата за тортура во партијата кон неистомисленици.
„Сосема е легитимно поднесување иницијатива за вонреден конгрес, и тоа е обезбедено. Иницијативата беше ставена на дневен ред, оти никој не може да го оспори тоа право. Ама, кога веќе има иницијатива за вонреден конгрес, не може да го занемариме и прашањето да се гласа доверба за сите потпретседатели, за сите членови на Извршниот одбор оти, на крајот, тоа е и контекстот на нивното барање, за нов Централен, нов Надзорен и дел од Извршниот. Се стави на дневен ред и прашањето за доверба и за вонреден конгрес и тие тогаш го напуштија состанокот. Како може некој некому да му го оспори правото да предложи друга точка? На крајот, мнозинството одлучува“,
вели Морачанин.
Таа посочува дека седницата на Централниот одбор вчера се одржала со физичко присуство поради олабавување на мерките и дека настанот поминал со придржување кон ковид-протоколите.
„Претходно кога ги одржувавме седниците онлајн, многу членови сакаа да оди во живо да се видиме во поширок состав и да може директно да комуницираат. Имаше расположение да биде во живо и тоа е добро, да нема сомненија дали некој се вклучил или не. Точно е дека имаше луѓе кои не беа членови на Централниот одбор, но тие беа замолени да ја напуштат салата и го сторија тоа. Не може сега да се прави обид да се делегитимира и Централниот одбор. Има записник од целата работа“,
вели Морачанин.
Од четири потпретседатели на ДОМ, останаа двајца, Бети Дејанова и Христа Најданов. На Дејанова не ѝ е изгласана недоверба, иако и таа била дел од иницијативата за вонреден конгрес. Сега, во рок од 30 дена, партијата би требало да ги пополни двете празни места.
Освен за потпретседателските функции, на Петровска и Богдановски им е изгласана недоверба и како членови на Извршниот одбор на партијата. Покрај нив, доверба за да остане член на Извршниот одбор не добила ниту Јасмина Пакашки.
Партијата вчера со писмено соопштение извести дека Централниот одбор одржал седница со физичко присуство и ковид-протоколи, на која била разгледана, како што е наведено, „нелегитимната иницијатива за одржување вонреден конгрес“.
„Мнозинството членови на Централниот одбор едногласно ја отфрли иницијативата, со образложение дека нема потреба од одржување на вонреден конгрес. Членовите истакнаа дека сега фокусот на ДОМ треба да биде подготовка за претстојните локални избори, а не задоволување на лични интереси на поединци“,
се вели меѓу другото во соопштението.