Според офицерот за безбедност во МО, воените претставници кои не добија „виза“ од НАТО добиле национални безбедносни сертификати во време на ВМРО-ДПМНЕ, а кај едно од лицата во досието фигурира и потписот на Ковачки
Помина времето за пазарење со безбедносните сертификати и нивно политизирање, возврати денеска полковникот и офицер за безбедност во Министерството за одбрана, полковник Горан Василевски, отфрлајќи ги како „лаги, манипулации и двојни аршини“ обвинувањата од полковникот Драган Ковачки, член на Извршниот комитет на ВМРО-ДПМНЕ, во врска со ветингот во Армијата и враќањето на двајца кандидати за воени претставници на земјава.
Василевски напомена дека ветингот го врши тим обучен од НАТО, експерти врз чија работа, како што рече, не се врши апсолутно никакво влијание, додека двете лица што ги спомнува Ковачки добиле НАТО и национално-безбедносни сертификати во времео на претходната влада, раководена од ВМРО-ДПМНЕ.
„Како припадник на безбедносниот сектор, кој носи одговорност во дел од процесот за издавање безбедносни сертификати, изразувам силна осуда за тенденциозно наметнатата тема за ветинг процесот која Ковачки и ВМРО-ДПМНЕ упорно ја форсираат во јавноста. Наспроти обвинувањата дека станува збор за непрофесионализам и партиско влијание, одговорно тврдам дека постапката за ветинг ја врши тим обучен од НАТО експерти врз чија работа не се врпи апсолутно никакво влијание, истакна Василевски во изјава пред Министерството.
Очекував, дополни, да престанат, зашто е непрофесионално ова што го прават и зашто во овој сектор лагите и манипулациите со кои се служат се опасни.
Но, бидејќи не престануваат, одговорност ми е да кажам дека маските мора да паднат. Денес ВМРО-ДПМНЕ и Ковачки паднаа во дупката која за друг ја копаа. Двете лица кои тој ги спомнува ги добиле своите НАТО и национално-безбедносни сертификати токму во времето на претходната влада, раководена од партијата која ги организира прес-конференциите. Добиле сертификати од нив, од нивно време, а за едно од лицата во досието фигурира и потписот на Ковачки кој потврдува дека нема никаков проблем на тоа лице да му се издаде национален и НАТО безбедносен сертификат. И сега зошто лаги, манипулации и двојни аршини? Како офицер за безбедност тврдам дека е поминато времето за пазарење со безбедносните сертификати и нивно политизирање“,
рече Василевски.
Ковачки и денеска на прес-конференција обвини дека „институциите под власт на СДСМ издаваат НАТО сертификати само на лица подобни за власта“.