Погледнете го новото издание на емисијата „360 степени”, емитувано на 9 ноември 2026 г. на МРТ 1, во кое гостува претседателот на Собранието, Африм Гаши
Претседателот на Собранието, Африм Гаши, во новото издание на „360 степени“ на МРТ 1, вели дека очекува редовни парламентарни избори, иако смета дека на Влен би му одговарало да се гласа сега. Победата на ДУИ во Брвеница, според него, не е знак дека Влен губи поддршка, а односите со ВМРО-ДПМНЕ ги оценува како стабилни. Усогласувањето на четирите структури во Влен го опишува како „ѓаволски тешка работа“, но вели дека нема проблем околу изборот на кадри.
За блокадата на европскиот пат, Гаши оценува дека ЕУ постапила неправедно кон земјава по Преспанскиот договор и предупредува дека прашањето за уставните измени не смее да прерасне во меѓуетнички спор. Прашан зошто Собранието одобрува помалку пари за судството и обвинителството од минимумот што самиот парламент го утврдил со закон, Гаши вели дека буџетот го подготвува Владата и дека независноста на правосудството зависи и од други фактори. Новиот Кривичен законик го очекува на почетокот на идната година и смета дека со него треба да се отстранат штетните последици од измените од 2023 година.
По суспензивното вето на претседателката Гордана Сиљановска-Давкова на измените на Законот за јавните набавки, Гаши ги повикува партиите да се договорат, а ако тоа изостане, вели дека за поднесените 2 158 амандмани ќе се расправа според Деловникот. Зборувајќи за изборната победа на студентите во Србија и за протестите во Албанија, Гаши оценува дека долгото владеење ги троши политичките елити и го зголемува незадоволството кај граѓаните.