Освен Петровска, кандидатура за иден лидер на СДСМ најави и Јован Деспотовски, актуелниот директор на Дирекцијата за технолошко-индустриски развојни зони (ТИРЗ), а речиси извесна е и кандидатура на ексминистерот за здравство Венко Филипче
Актуелната пратеничка и досегашна министерка за одбрана Славјанка Петровска и официјално потврди дека ќе се кандидира за претседател на СДСМ.
Официјалната потврда Петровска ја дала во изјава за ТВ 24, откако неколку пати изминатите две недели во медиумите посочуваше дека размислува да влезе во трката за наследник на Димитар Ковачевски.
„Ќе се кандидарам за претседател на СДСМ“,
изјавила Петровска за ТВ 24.
На последните парламентарни избори одржани на 8 мај, Петровска беше носителка на пратеничката листа на СДСМ во ИЕ 6 и стана пратеник во новиот парламентарен состав. На функцијата министер за одбрана дојде во 2022 година.
Освен Петровска, кандидатура за иден лидер на СДСМ најави и Јован Деспотовски, актуелниот директор на Дирекцијата за технолошко-индустриски развојни зони (ТИРЗ), а речиси извесна е и кандидатура на ексминистерот за здравство Венко Филипче.
Внатрепартиските избори во СДСМ се најавени дека ќе се случуваат во јуни, а вечерва на седница на Централниот одбор треба да се утврдат правилата околу постапката.
Од утре почнува официјалниот рок за поднесување на кандидатури за иден лидер на СДСМ.
Лидерот на СДСМ, Димитар Ковачевски, по парламентарните избори на 8 мај официјално го потврди своето повлекување од претседателската функција во партијата.
Како и по изборната ноќ на 8 мај, Ковачевски оцени оти со поразот на изборите, на СДСМ му е нанесен тежок удар и оти партијата ќе треба да погледне навнатре и да се реформира.