Претседателот на државата ја охрабрува Владата по празникот да го разгледа планот за постепено враќање на стопанската активност во земјава
Претседателот Стево Пендаровски смета дека забраната за движење на цела територија во траење од над 80 часа ја става земјата во групата земји со најригидни мерки во Европа и додаде дека тие треба да се применуваат по исклучок и во разумен временски период.
„Со забраната за движење од над 80 часа на цела територија, како што е за празникот, ние спаѓаме во групата на земји со најригидни мерки во Европа. Оправданоста на оваа мерка не само мене туку и на голем број граѓани им е совршено јасна, но најдрастичните мерки треба да се применуваат по исклучок и во некој разумен период. Сè над тоа ќе биде контапродуктивно, иако можеби ќе ги реши проблемите во здравството“,
рече Пендаровски на денешната прес-конфереција по седницата на Советот за безбедност, на која исто така соопшти дека ќе донесе нова одлука за вонредна состојба за уште 30 дена.
Тој, исто така, рече дека истиот став го има и за целосното затворање на стопанските субјекти. Поради тоа, тој ја охрабри Владата по празниците да го дефинира планот за фазно, постепено враќање на стопанската активност во земјата.
„Не само ние туку и светот ќе мора да живее со вирусот подолго време, и треба да изнајдеме модалитети општеството да продолжи да живее со сите рестрикции и превентивни мерки“,
рече Пендаровски.
Во врска со претстојниот христијански празник Велигден, кој традиционално се прославува со одење во цркви и кај роднини, Пендаровски рече дека црквата мора да се сообрази со правилата кои важат за сите останати.
„Со пандемијата, на сите ни се или одземени или редуцирани некои права, како правото на слободно движење или образование, но имаме повисока цел, да го заштитиме здравјето на сите граѓани. Ниту една религиозна заедница не е над другите, ниту еден верник не е поважен од некој атеист и обратно. За една недела започнуваат рамазанските пости кои ќе бидат исто така во вонредна состојба. Една работа да ни биде јасна – само заедно и со меѓусебен респект можеме да ја надминеме оваа криза“,
рече Пендаровски.
*Поврзана вест
Да се размисли за засилени рестрикции во Куманово, апелираше Пендаровски