Во изјавата на двајцата вицепремиери, практично, се посочува дека Пауновски го прекршил Кодексот за избрани и именувани функционери. Исто така, се нагласува и дека не треба да се манипулира јавноста дека „рамковните прераспределувања“ ја заменуваат потребата од нови кадри, посебно во инспекторатите
По најавата на премиерот Зоран Заев дека очекува предлог за разрешување на директорот на Државниот пазарен инспекторат Стојко Пауновски, попладнево се јавија со заедничка изјава вицепремиерите Артан Груби и Љупчо Николовски, објаснувајќи дека со планот за распределба на административните службеници преку програмата К-5, усвоен на 40. владина седница, Владата нашла решение за еден сериозен децениски проблем за кој реагирале граѓаните. Тие посочуваат дека досега ниту една институција не одбила да учествува во прераспределувањето на овие службеници. Во изјавата, меѓу другото, се посочува и дека Заев вчера се обидел директно да контактира со Пауновски, ама тој не одговорил на повикот.
„Согласно со Законот за преземање административни службеници, 1 349 вработени, според програмата за правична застапеност, конечно се распределуваат на конкретни работни задачи во вкупно 237 институции. Тоа не се нови вработувања туку станува збор за решение со кое државата конечно обезбеди конкретни ангажмани за вработени лица кои со години беа причина за незадоволство кај јавноста од една страна, а кои во исто време не добиваа никакви работни задачи од институциите, од друга страна.Спроведувањето на решението е распределено хоризонтално и солидарно со вклученост на дури 237 институции и до сега ниту една не одбила да учествува во решението, туку се барале модалитети и начини истото да се спроведе“,
се наведува во изјавата на Груби и на Николовски.
Во владиното соопштение се наведува дека:
- Досега се распоредени 635 лица кои имаат конкретни ангажмани, за конкретна јавна служба и кои конечно се внесени во систем на оценување и мерење на нивниот ангажман.
- Од почетокот на следниот месец, започнува распоредувањето на друга група по утврдениот план и тоа: 18 во Агенцијата за вработување, три во Инспекторат за јазици и шест во Централен регистар.
- Исто така, 143 се во процедура да почнат со реален работен ангажман во МВР, а 101 во УЈП.
- Од вкупната бројка на лица што се распоредуваат, 1 182 прифатиле распределување, 38 одбиле и се на трансфер листа, 13 самите дале отказ, а останатите ги исполниле условите за старосна пензија.
- Според овие податоци, успешноста на планот е речиси 90 проценти.
„Вработените се распоредуваат во друга институција од јавен сектор на соодветно место на исто ниво, односно на работно место за кое вработениот ги исполнува општите и посебните услови утврдени во актот за систематизација на работни места во институцијата во која се распоредува. Овие лица се веќе вработени, за нив не се потребни дополнителни финансии и, согласно со планот, по распределбата во конкретните институции, нивната работа ќе биде оценувана според критериумите на мерит системот. Административните службеници кои се распоредуваат не се замена за редовните побарувања за кадри кои ги имаат институциите, како, на пример, побарувањата што ги имаат инспекторатите.
се наведува во заедничката изјава на Груби и на Николовски.
Побарувањата за нови вработувања одат низ целосно одвоена процедура врз која никако не влијаат овие распоредувања“,
Потоа се посочува дека Владата, на 43 седница донесеодлука за 104 нови вработувања на инспектори во инспекторатите, при што ги има задолжено министерствата за финансии, за информатичко општество и администрација и за политички систем да ги одобрат годишните планови за вработување во инспекциските служби, а особено за Државниот пазарен инспекторат. Како што се тврди, станува збор за нови вработувања кои никако не се поврзани со распределбата на веќе вработените според правична застапеност.
„Владата нема очекувања ниту побарувања распределените лица во Инспекторатот да ги вршат работите на инспекторите, но Владата знае дека во сите институции има потреба од дополнителен ангажман на различни нивоа, особено ако за тоа институцијата нема дополнителен финансиски трошок. Затоа, не треба да се манипулира јавноста дека ова распоредување кое е согласно усвоен закон и согласно одлуки на Владата, ја заменува потребата од нови кадри. За секое несогласување околу владини одлуки постоеле и постојат јасни механизми истото да се оствари низ институциите преку соодветната организациска поставеност, преку службени белешки, преку работни состаноци, на кои се аргументираат спроведувањето на политиките и одлуките во реализацијата на програмите на Владата. Воедно, ја известуваме јавноста дека премиерот Заев во текот на вчерашниот ден имал обид за директна комуникација со директорот Пауновски со цел изнаоѓање заедничко решение, но Пауновски не одговорил на повикот“,
се нагласува во изјавата на првиот вицепремиер и на вицепремиерот за спречување корупција, човечки ресурси и одржлив развој.
Во нивнотосоопштение се посочува и дека, со истапувањеод јасно утврдени канали за комуникација во рамките на владините институции, експлицитно се прекршува членот 4 и членот 6 од Кодексот за етичко однесување на членовите на Владата и носителите на јавни функции, именувани од страна на Владата:
- Според членот 4, носителите на извршни функции ги вршат своите јавни овластувања и должности согласно Уставот, законот и другите прописи донесени врз основа на закон.
- Согласно членот 6, носителите на извршни функциите слободно и отворено ги изразуваат ставовите во врска со предложените политики, но солидарно ги поддржуваат владините политики и одлуки откако тие ќе бидат донесени, а во своите јавни настапи политиките ги презентираат во согласност со овој Кодекс.
- Според членот 10 од Законот за државен пазарен инспекторат, со работите на инспекторат со кој раководи директор кој го именува и разрешува Владата на Северна Македонија.
- Според член 14 од Законот за инспекциски надзор, со инспекторатот раководи директор, кој го именува и разрешува Влада во согласност со законот.
- Согласно член 6 од Закон за организација и работа на органите на државна управа самостојниот орган на државната управа, каков што е Државниот пазарен инспекторат, за својата работа одговара пред Владата на Република Северна Македонија, а во законот се предвидени постапки за непочитување на одлуки на Владата, меѓу кои и предлог за разрешување.