Цената на парното за потрошувачите приклучени на најголемата топлинска мрежа во Скопје од август се зголемува за 14,18 проценти, соопшти претседателот на Регулаторната комисија за енергетика, Марко Бислимовски.
„На најголемата мрежа на која се снабдуваат преку 90 проценти од потрошувачите во Скопје цената се зголемува за 14,18 проценти. За потрошувачите во железарското греење, во енергетиката цената се зголемува за 15,58 проценти и за потрошувачите приклучени на мрежата на Скопје Север, цената се зголемува за 16, 31 процент“,
кажа Бислимовски по денешната седница на Регулаторна.
Тој даде и пример за колку би биле повисоки просечните сметки.
„За една просечна сметка од 1 800 денари, тоа значи зголемен трошок од 250 денари“,
посочи Бислимовски.
Причината за сите поскапувања е цената на природниот гас, посочи тој.
„Овие неколку дена цената на природниот гас збесна и е околу 2 200 долари за нормален метар кубен, тоа е една цена која што никој не можел да ја предвиди, ни во најлошите сценарија. За жал, мора да живееме со овие високи цени и имајќи предвид дека земји во Европа се соочуваат и со проблеми во однос на обезбедување на природниот гас“,
кажа Бислимовски.
Според пресметките на Регулаторна, се предвидува ТЕ-ТО да обезбеди 70 проценти од потребната топлинска енергија, а 30 проценти да се обезбедат од топланите во Градот Скопје.