Ова е втора првостепена пресуда и на неа право на жалба имаат и обвинителството и одбраната пред Апелацискиот суд во Белград
Според обвинението, Владимир Кецмановиќ се товари за тешко кривично дело против општата сигурност и занемарување и злоупотреба на малолетно лице, додека неговата сопруга е обвинета за занемарување и злоупотреба на малолетно лице, а претходно беше ослободена од дел од обвиненијата поврзани со оружје и експлозивни материи
Вишиот суд во Белград донесе првостепена пресуда со која ги осуди Владимир и Миљана Кецмановиќ, родителите на момчето кое во мај 2023 година изврши масовно убиство во основното училиште „Владислав Рибникар“ во Белград, при што беа убиени девет ученици и еден чувар, а неколку лица беа повредени
Според одлуката на судот, Владимир Кецмановиќ е осуден на 14 години и шест месеци затвор за занемарување и злоупотреба на малолетно лице и тешки дела против општата безбедност, додека неговата сопруга Миљана Кецмановиќ доби казна од две години и 11 месеци затвор за истото кривично дело, во делот на занемарување и злоупотреба на малолетно лице.
Ова е втора првостепена пресуда и на неа право на жалба имаат и обвинителството и одбраната пред Апелацискиот суд во Белград.
Инаку, на 10 јуни, главниот јавен обвинител на Вишото јавно обвинителство во Белград, Ненад Стефановиќ, предложи Владимир и Миљана Кецмановиќ да бидат прогласени за виновни и осудени на максимални затворски казни.
Според обвинителството, нивниот син, како малолетник, не може да биде кривично одговорен, поради што на родителите им припаѓа посебна законска и морална одговорност за неговото воспитување и надзор.
Судењето беше повторено откако Апелацискиот суд во ноември минатата година ги прифати жалбите на одбраната и го поништи делот од првостепената пресуда поради суштински повреди на кривичната постапка, по што предметот беше вратен на повторно судење.
Во меѓувреме, притворот на Владимир Кецмановиќ беше продолжен до донесување нова пресуда, додека Миљана Кецмановиќ се бранеше од слобода.
Според обвинението, Владимир Кецмановиќ се товари за тешко кривично дело против општата сигурност и занемарување и злоупотреба на малолетно лице, додека неговата сопруга е обвинета за занемарување и злоупотреба на малолетно лице, а претходно беше ослободена од дел од обвиненијата поврзани со оружје и експлозивни материи.
Апелацискиот суд претходно му ја намали казната на инструкторот во стрелачкиот клуб „Партизан“, Немања Маринковиќ, каде што таткото го одвел својот син на обука со оружје, од една година и три месеци на една година домашен притвор.
Обвинителството претходно бараше повисоки казни, односно за Владимир Кецмановиќ беше предложена единствена казна од 14 години и 11 месеци затвор, додека за Миљана Кецмановиќ беше побарана казна од три години затвор.
Во мај годинава се одбележаа три години од масовното убиство во „Рибникар“ во Белград.
Злосторството се случи на 3 мај 2023 година, во училиштето што го посетуваше самиот сторител, тогаш 13-годишниот Коста Кецмановиќ
Во нападот беа убиени учениците: Бојана Асовиќ, Ана Божовиќ, Катарина Мартиновиќ, Мара Анѓелковиќ, Ема Кобиљски, Софија Негиќ, Андрија Чикиќ, Адријана Дукиќ и Ангелина Аќимовиќ и работникот во обезбедувањето Драган Влаховиќ.
Пет ученици и еден наставник по историја беа ранети.
Злосторството беше извршено за време на настава.
Од денот на извршувањето на масакрот, сторителот се наоѓа во психијатриска болница.