Вишиот суд во Белград по изрекувањето на пресудата соопшти дека Владимир Кецмановиќ е прогласен за виновен за сторено кривично дело против општата безбедност и запуштање и злоупотреба на малолетно лице. За запуштање и злоупотреба на малолетно лице е осудена и Миљана Кецмановиќ, мајката на момчето
Владимир Кецмановиќ, таткото на момчето кое изврши масовно убиство во мај 2023 година во основното училиште „Владислав Рибникар“ во Белград, денеска со првостепена пресуда во Вишиот суд во Белград е осуден на 14,5 години затвор. Мајката на момчето, Миљана Кецмановиќ, според пресудата на Вишиот суд, е осудена на три години затвор. На една година и три месеци затвор е осуден и Немања Маринковиќ – инструкторот на стрелиштето каде што, според обвинението, Владимир Кецмановиќ го однел синот на вежбање за стрелање.
Вишиот суд во Белград по изрекувањето на пресудата соопшти дека Владимир Кецмановиќ е прогласен за виновен за сторено кривично дело против општата безбедност и запуштање и злоупотреба на малолетно лице. За запуштање и злоупотреба на малолетно лице е осудена и Миљана Кецмановиќ, мајката на момчето.
Инструкторот по стрелање е осуден за лажно сведочење.
Судот соопшти дека на таткото на момчето му е продолжен притворот, а на мајката ѝ е продолжена мерката забрана за приближување, средба или комуникација со синот, која може да трае сè додека има потреба, најдоцна до правосилноста на пресудата.
Жалби на пресудата најавија адвокатите на обвинетите Владимир и Миљана Кецмановиќ.
Вишото јавно обвинителство во Белград, пак, најави дека ќе поднесе жалба до Апелацискиот суд и ќе бара максимална казна за обвинетите. На 20 декември главниот обвинител на Вишото јавно обвинителство во Белград, Ненад Стефановиќ, побара од Судот обвинетите да бидат осудени на максимални законски казни.
Малолетниот Коста Кецмановиќ, тогаш 13-годишно момче, на 3 мај минатата година застрела девет ученици, еден припадник на обезбедувањето и повреди уште пет ученици и наставник во Основното училиште „Владислав Рибникар“ во Белград. Тој е во психијатриска болница од денот на извршувањето на масакрот.
Момчето беше сослушано во постапката, а потоа беше предложен обвинителниот акт против неговите родители.