Османи вели дека очекува многу брзо да се формираат институциите со претставници на двете поголеми заедници во државата
Прашањето за „ротирачки премиер“ досега не сме го разговарале ниту во ДУИ ниту со други партии, изјави Бујар Османи во гостување на телевизија „Сител“.
„Прашањето на ротации што се покренува од аналитичарите веројатно го покренувале искуствата во светот како Израел и други влади. Ние за тоа прашање не сме разговарале во нашата партија за да имаме став. Ниту во нашата партија, ниту со други партии. Затоа, повеќе ги гледам како аналитички пристап на различни варијанти на една идеја во зависност од искуствата што ги има светот“,
вели Османи.
Во однос на формирањето на новата Влада, Османи порача дека резултатите се јасни и оти нивната партија е апсолутен победник кај албанското гласачко тело, а со тоа Албанците, како што рече, и дадоа легимитет на оваа партија да разговара со македонска политичка партија за составување влада.
„Непишано правило е кај нас владата да ја сочинуваат претставници на двете поголеми заедници, со цел институционално да се канализира етничката енергија. Тоа го научивме од искуството и се покажа како најдоброто решение за политичката стабилност во оваа држава, бидејќи доколку не ја канализирате етничката енергија на институционален пат, тогаш ни се случува злоупотреба на таа енергија од различни трети страна. Резултатите се јасни. Јас очекувам многу бргу да се формираат институциите со претставниците на двете поголеми заедници во државата“,
посочи Османи.
Прашањето за „ротирачки премиер“ се отвори во јавноста откако весникот на албански јазик „Коха“ јави дека, наводно, e постигнат договор меѓу ДУИ и коaлицијата СДСМ-Беса на премиерското столче три години да седи функционер од СДСМ, а една од ДУИ.
Овие наводи ги демантираше и СДСМ од каде изразија сомнеж дека пласирањето на ваков концепт за избор на премиер е обид на ДУИ да го релативизира своето главно барање за време на изборите – за прв премиер Албанец.