Од ВМРО-ДПМНЕ додаваат дека опозициската СДСМ е партија со двојни стандарди, чиј претседател е амнестиран за модуларната болница преку корумпираното судство на судии и обвинители, за кои велат дека се избрани во Зајас и во Струмица
СДСМ да престане да ја злоупотребува трагедијата во Кочани за дневнополитички поени и да престане со двојните стандарди. Ова е реакцијата на владејачката ВМРО-ДПМНЕ по денешната прес-конференција на портпаролката на СДСМ, Богданка Кузеска, која рече дека осумнаесет месеци од трагедијата во „Пулс“, правдата за Кочани се топи пред очите на јавноста. Таа обвини дека наместо брза и неселективна одговорност, јавноста е сведок на одолжување на постапките и ослободување на лица поврзани со случајот.
„СДС нема никаков морален кредибилитет да држи лекции за одговорност и правда, додека нема одговорни и никој не одговара за трагедијата во модуларната болница во Тетово, во која животот го загубија 14 луѓе“,
се вели во реакцијата од ВМРО-ДПМНЕ.
Од ВМРО-ДПМНЕ додаваат дека опозициската СДСМ е партија со двојни стандарди, чиј претседател е амнестиран за модуларната болница преку корумпираното судство на судии и обвинители, за кои велат дека се избрани во Зајас и во Струмица.
„Венко Филипче, како тогашен министер за здравство, носи политичка одговорност за системот во чие време се случи трагедијата. Одговорност за секој пропуст, секој договор и секоја одлука мора да има, додека Филипче енормно се богатеше и профитираше за време на кризата“,
додаваат од ВМРО-ДПМНЕ.
Оттаму велат дека СДСМ треба да престане да ја злоупотребува трагедијата во Кочани за дневнополитички поени и да престане со двојните стандарди.
„Владеење на правото и правдата во Македонија мора да има. Време е да се стави крај на партиските послушници во правосудството на СДС и ДУИ, кои го штитат криминалот на СДС, Заев, Филипче и останатите блиски до кланот Заеви. Правдата не смее да биде селективна. Правдата мора да важи подеднакво за сите“,
се додава во соопштението од ВМРО-ДПМНЕ.
Кузеска денеска рече дека правдата за Кочани не смее да се разводни и да се одложи, и бараат целосна, неселективна и вистинска одговорност за секој што дозволил, овозможил или прикривал незаконско работење во случајот. Опозиционерите обвинија дека премиерот Христијан Мицкоски го држи судството под контрола и ги штити своите, а жртвите и нивните семејства ги остава без одговори и без правда.