Министерскиот совет, според Османи, не е само настан, туку потврда дека Северна Македонија е сериозен партнер во меѓународните односи и директен учесник во носењето на геополитичките одлуки
Министерскиот совет е круната на Претседавањето на Северна Македонија со најголемата светска регионална безбедносна организација – ОБСЕ, напиша министерот за надворешни работи Бујар Османи на социјалната мрежа Фејсбук, одбројувајќи уште шест дена до одржувањето на овој, како што рече, најзначаен меѓународен собир одржан во земјава.
Министерскиот совет, според Османи, не е само настан, туку потврда дека Северна Македонија е сериозен партнер во меѓународните односи и директен учесник во носењето на геополитичките одлуки.
„Останува финалето – да се покажеме како добри домаќини и успешни организатори на Министерскиот совет на ОБСЕ“,
напиша Османи.
Според него, со секој изминат ден се приближуваме до моментот кој ќе ја обликува иднината на меѓународната соработка.
„Одбројуваме уште шест дена до најзначајниот меѓународен собир одржан во Република Северна Македонија во нејзината историја. Немам сомневање дека сме подготвени да им посакаме добредојде во Скопје на делегациите на 67 земји, земји учеснички на ОБСЕ и земјите од медитеранската и азиската група партнери за соработка“,
заклучи тој.
Над 1 000 гости од 76 делегации ќе присуствуваат во Скопје на министерскиот годишен собир на ОБСЕ што ќе се одржи од 29 ноември до 1 декември. Тоа ќе биде најголем настан во државава, и по димензии и по суштина, најави Османи на почетокот на месецот.
Министерот Османи, пред две недели во интервју за емисијата „360 степени“ на МРТ 1, зборуваше за организацијата на Министерскиот совет на ОБСЕ, а посочи и дека нема никакви индикации дека шефот на американската дипломатија Ентони Блинкен нема да дојде на настанот.
Во однос на тоа дали во земјава ќе дојде и рускиот министер за надворешни работи Сергеј Лавров, тој рече дека процедурата за неговото доаѓање е започната, но дека неговото пристигнување е сè уште неизвесно.