По земјотресот во Битола, превентивно е затворена една детска градинка, а одлуката е донесена со цел стручни лица да извршат дополнителна проверка за безбедноста
За утврдување на сите материјални штети во градот ќе биде формирана комисија за процена на штети
Општина Битола ќе бара помош од Владата за санирање на штетите по синоќешниот силен земјотрес, најави денеска претседателката на општинскиот совет, Габриела Илиевска.
„Денеска ќе имаме седница и ќе донесеме заклучок кој ќе го доставиме до Владата и ќе бараме одржување на итна седница на која ќе се разгледа состојбата во Битола и ќе бараме Владата да излезе во пресрет. Колкави се штетите не знаеме сè уште, но сметаме дека Битола мора во најбрз можен рок да ги санира штетите кои се случија во текот на вчерашната ноќ. Владата треба да излезе во пресрет бидејќи Битола е дел од државата и ни следуваат средства кои би ни помогнале за санирање на штетите“,
рече Илиевска.
Градоначалникот Тони Коњановски информира дека по земјотресот превентивно е затворена една детска градинка, која работи во состав на детските градинки „Мајски цвет“, а одлуката е донесена со цел да стручни лица да извршат дополнителна проверка за безбедноста.
За утврдување на сите материјални штети во градот ќе биде формирана комисија за процена на штети.
„Синоќа, на терен затекнавме паника. Граѓаните беа излезени од зградите. Атмосферата не потсети на потресот од 1994 година. Штетите ќе ги процени самата Комисија во најбрз можен рок. Ако треба ќе има и две комисии во зависност од штетите, но во однос на она што го видовме сепак се работи за помали оштетувања“,
рече Коњановски.
Според информациите од Регионалниот центар за управување со кризи во Битола, до денеска до 10 часот имало околу 100 повици од граѓани кои барале информации за земјотресот, а десетина пријавиле материјални штети во нивните домови.
Пријавени се испукани ѕидови и фасади, пукнатини по скали, паднати тавани, исклучена електрична и водоводна инсталација.