Адвокатите на тројцата обвинети, исто така, чекаат да им бидат доставени и други докази кои, како што посочија, до почетокот на денешната расправа не ги добиле од Обвинителството за гонење организиран криминал и корупција (ОЈО ГОКК). Следното рочиште е закажано за 20 март
Во случајот „Империја“ на обвинителна клупа се најдоа Цветан Панделевски, Зоранчо Митровски и Јованчо Тасковски. Иако во истражната постапка беа опфатени 19 лица од кои дел во меѓувреме признаа вина и постигнаа спогодби со обвинителството, за дел беше прекината постапката поради застарување, а за дел имаше решенија за неповедување кривична постапка
Денешното рочиште од судскиот процес против преостанатите тројца обвинети во случајот „Империја“, кое требаше да почне денеска во Основниот кривичен суд Скопје, се одложи на барање на одбраната.
Адвокатите на обвинетите побараа од судот да им биде дадено повеќе време за разгледување на листата на докази што ја добиле неодамна. Адвокатите на тројцата обвинети, исто така, чекаат да им бидат доставени и други докази кои, како што посочија, до почетокот на денешната расправа не ги добиле од Обвинителството за гонење организиран криминал и корупција (ОЈО ГОКК), пренесува државната новинска агенција МИА.
Во случајот „Империја“ на обвинителна клупа се најдоа Цветан Панделевски, Зоранчо Митровски и Јованчо Тасковски. Иако во истражната постапка беа опфатени 19 лица од кои дел во меѓувреме признаа вина и постигнаа спогодби со обвинителството, за дел беше прекината постапката поради застарување, а за дел имаше решенија за неповедување кривична постапка.
Главен судија во судечкиот совет во „Империја“ е судијката Васка Николовска-Масевска. Обвинителниот акт во застапува обвинителката Лиле Стефанова.
Тројцата обвинети што останаа се товарат за кривичните дела злоупотреба на службената положба и овластување, перење пари и измама.
Обвинителниот акт против нив ОЈО ГОКК го поднесе на 21 декември минатата година со кој до судот е доставен и предлог од тројцата обвинети да се конфискува имот во вкупна вредност од 292 333 000 денари или 4 753 382 евра.
„Според опишаните дејствија во Обвинителниот акт, прво и второобвинетиот и веќе едно осудено лице, во периодот од мај до август 2013 година како соизвршители ги искористиле своите овластувања како одговорни лица – членови на Одбор на директори на правно лице и претставници на акционерскиот капитал. Тие заедно, по претходен договор, со умисла помогнати од сведок–соработник на правдата и веќе осудено лице во предметот, прибавиле значителна имотна корист во износ од 4 000 000 евра за три правни лица, а на штета на оштетеното правно лице и 150 малцински акционери. Со намера да го прикријат изворот од казненото дело, прво и второобвинетиот паричните средства ги пренесувале на жиро сметки на други правни лица“,
беше наведено во соопштението од Обвинителството.
Според ОЈО ГОКК, во периодот од октомври 2013 година до јануари 2014 година двајца сведоци соработници на правдата заедно, како соизвршители со прво и третообвинетиот, со намера за себе и за друг да прибават значителна противправна имотна корист, довеле во заблуда едно физичко и едно правно лице.
„Со цел по пониска цена да ги земат акциите што во друго правно лице ги поседувале оштетената и оштетеното правно лице, лажно прикажувајќи факти ја довеле во заблуда оштетената да преземе дејствија со кои нанела значителна имотна штета од 283 591 535 денари на себе си и правното лице за сметка на акциите што ги поседувале и што биле продадени на физички и правни лица за износ од 433 592 465 денари. Откако со извршување на кривичното дело измама била прибавена корист за правно лице во кое еден од сведоците на правдата бил сопственик и управител, за да ги прикрие парите дека потекнуваат од кривично дело, по основ на позајмици ги пренел на три правни и едно физичко лице, а потоа уделот од правното лице што го поседувал го пренел на трите правни лица на кои им биле дадени позајмици, па откако имотната корист прибавена со кривичното дело им била исплатена како дивиденда од по 107 833 000 денари, правното лице било пренесено на офшор компанија од Белизе и ликвидирано“,
информираа на 21 декември од Обвинителството.
Парите прибавени од кривично дело и исплатени по основа на дивидендата на правното лице каде членовите на семејството на првообвинетиот биле сопственици, за да се прикрие дека потекнуваат од кривично дело по насоки на првообвинетиот и по основа на позајмица биле префрлени 62 000 000 денари на неговата лична сметка, а останатите во износ од 45 833 000 денари правното лице ги пуштило во оптек за плаќање по разни основи.
Меѓу седумтемина осомничени кои добија пресуди откако се спогодија со обвинителството, се и ексдиректор на поранешната Управата за безбедност и контраразузнавање (УБК), Сашо Мијалков и бизнисменот Јордан (Орце) Камчев.
Мијалков со спогодбата доби тригодишна затворска казна и конфискација на имот во вредност од, како што тврдеше тогашната шефица на ОЈО ГОКК, Вилма Русковска, 30 милиони евра. Затворската казна наместо во „Идризово“ тој ја издржува во затворот во Струга, кој е од отворен тип, откако непосредно пред издржувањето ја казната ја смени адресата на живеење од Скопје во Охрид.
Покрај тоа, сторијата што неодамна ја објави „360 степени“ покажа дека недвижниот имот на Сашо Мијалков конфискуван во предметот „Империја“ вреди 15 милиони евра, а не 30 милиони.
Спогодбата на Јордан Камчев, откако призна вина, беше да отслужи една година затвор и преку неговите фирми да уплати 5,2 милиони евра во Управата за јавни приходи односно во државниот буџет. Пресудата за „Империја“ му беше споена со онаа во случајот „Плацови на Водно“ со што тој доби вкупно 20 месеци затвор, кои како и Мијалков ги издржуваше во КПД „Струга“ од каде што на слобода излезе на 6 ноември минатата година.
Во пресрет на судскиот процес за „Империја“, сопственикот на „Пелистерка“, Цветан Панделевски, пак, во обраќање до јавноста посочи дека одбива да се спогоди со Обвинителството тврдејќи дека е невин. Ова, како што вели бил единствениот одговор што им го дал на своите пријателите и познајниците кои го прашувале зошто и тој не се договорил со обвинителката Лиле Стефанова, како што сторија Мијалков и Камчев.
„Нема да навлегувам во туѓи аргументи, нема да обвинувам други обвинети. Но, барам јасен одговор од страна на обвинителката Лиле Стефанова. За кое дело од обвинителниот акт сега ќе ме гоните мене? Што јас сум направил кога вие со спогодбите кои ги направивте, покривте 80 отсто побарувања од вашето обвинение? Вие самите сте потпишале спогодба со која сте се договориле. Не разбирам што јас сум сторил?“,
прашува Панделевски.
Тој потенцира дека дека обвинителката Лиле Стефанова не располага со никакви докази за делото кое му се става на товар.