Одложено гласањето за резолуцијата за Сребреница во ОН, текстот се испраќа на ревизија

Во седиштето на Обединетите нации во Њујорк се одржуваат неформални консултации за нацрт-резолуцијата со која 11 јули се прогласува за меѓународен ден на сеќавање на геноцидот во Сребреница

Гласањето за резолуцијата за Сребреница нема да се одржи на 2 мај, а причина за одложувањето е тоа што текстот на нацрт-документот се испраќа на ревизија, потврдил вечерва за Н1 амабсадорот на Босна и Херцеговина во Обединетите нации (ОН), Златко Лагумџија.  

Кога ќе се одржи седницата на Генералното собрание на ОН, на која треба да се гласа за резолуцијата, според амбасадорот треба да се знае во вторник.  

„Во овој момент знаеме дека седницата нема да се одржи на 2 мај, бидејќи денеска го испраќаме текстот на резолуцијата на ревизија, доколку земјите членки на ОН имаат други предлози за текстот. Генералното собрание секако ќе биде по 6 мај, во зависност од распоредот на седниците што ќе знаеме во вторник“,

рекол Лагумџија. 

Во оваа одлука, како што рекол тој, учествувала и мисијата на БиХ во ОН, за да им се даде време на оние на кои тоа им е потребно. 

Српскиот претседател Александар Вучиќ во Њујорк изјавил дека Соединетите Американски Држави, Германија и други земји го засилиле лобирањето за резолуцијата за Сребреница, поради кампањата што Белград ја води против нејзиното усвојување. 

Вучиќ по средбата со О’Брајан: За Косово и Сребреница имаме различни позиции, но важно е да се формира Заедница на српските општини

Северна Македонија, како што соопшти неодамна министерот за надворешни работи Бујар Османи, е една од 17 држави кои ја коспонзорираат резолуцијата на Обединетите нации.  

Османи: Би сакал да се сретнам со луѓето што реагираа за резолуцијата за Сребреница, шокиран сум што воопшто се дебатира за ова

Инаку, во седиштето на Обединетите нации во Њујорк се одржуваат неформални консултации за нацрт-резолуцијата со која 11 јули се прогласува за меѓународен ден на сеќавање на геноцидот во Сребреница. 

Како што е објавено на официјалната веб-страница на ОН, консултациите за нацртот насловен „Меѓународен ден на сеќавање на геноцидот во Сребреница 1995 година“ го свикале постојаните мисии на Германија и Руанда, заедно со мисиите на Албанија, Босна и Херцеговина, Чиле, Финска, Франција, Ирска, Италија, Јордан, Холандија, Лихтенштајн, Малезија, Нов Зеланд, Словенија, Турција и Соединетите Американски Држави.  

Во документот за резолуцијата, во кој увид имала Радио Слободна Европа, меѓу другото, се бара без резерва да се осуди секое негирање на геноцидот во Сребреница, како и дејствијата со кои се величаат осудените за воени злосторства, вклучително и одговорните за геноцидот во Сребреница. 

Официјален Белград и властите на Република Српска негираат дека бил извршен геноцид во Сребреница во јули 1995 година. 

Се одржа сесрпски митинг во Бања Лука против резолуцијата за Сребреница во ОН

Во 2007 година, Меѓународниот суд на правдата во Хаг го окарактеризира злосторството во Сребреница како геноцид, а во кое беа убиени повеќе од 8 000 мажи и момчиња од енклавата под заштита на Обединетите нации за време на војната во БиХ.

За овие злосторства, повеќе од 50 лица се осудени на вкупно околу 700 години затвор. 

Поранешниот висок претставник на меѓународната заедница во Босна и Херцеговина, Валентин Инцко, користејќи ги овластувањата на 23 јули 2021 година наметна измени на Кривичниот законик на БиХ со кои се забранува и пропишува казна за негирање на геноцид и величење на воени злосторници, пишува регионалниот сервис на РСЕ.