На прашањето како ја коментира реакцијата на шефот на српската дипломатија Ивица Дачиќ за ова прашање, министерот за надворешни работи вели дека потегот е втемелен на тоа што С Македонија е држава која промовира толеранција и хармонија и е пример во регионални и пошироки рамки, што значи функционална мултиетничка демократија
Министерот за надворешни работи Бујар Османи вели дека е шокиран од реакциите, особено за оние во Србија, кои ги предизвика неговата изјава оти земјава е еден од коспонзорите на резолуцијата на Обединетите нации (ОН) за прогласување на 11 јули за меѓународен ден за сеќавање на геноцидот во Сребреница.
Тоа е исто, рече Османи, како Германија да реагира зашто ние го осудуваме тоа што се случило во холокаустот.
Прашан дали била потребна ваквата резолуција, со оглед на тоа што македонските граѓани гледаат најголем пријател во соседна Србија, Османи вели дека е шокиран оти воопшто се дебатира за ова прашање. Рече дека не смее да се дозволи да се размислува за односите помеѓу државите врз основа дали ќе се осуди или не геноцид.
„Тоа е како ние да анализираме дали ќе се нарушат односите врз основа на тоа дали се осудува или не геноцидот. Дали се слушаме што зборуваме? Осудуваме геноцид, убиство на осум илјади цивили во еден ден. Зар ќе правиме дебата во оваа држава дали е тоа добро или лошо, дали требало да се прави или не, дали треба да се осуди или не. Каква е таа дебата? Јас сум шокиран. Јас очекував Србија прва да гласа за да го тргне тоа бреме од себе. Па зар ние како држава уште имаме дилеми дали осудуваме геноцид или не. Тоа не е прашање на односи, тоа е универзална човечка должност да осудите“,
рече Османи.
На прашањето како ја коментира реакцијата на шефот на српската дипломатија Ивица Дачиќ за ова прашање, тој вели дека потегот е втемелен на тоа што С Македонија е држава која промовира толеранција и меѓуетничка хармонија и е пример во регионални и пошироки рамки што значи функционална мултиетничка демократија.
„Навистина сакам да ги сретнам тие луѓе физички коишто ми велат зошто осудивме геноцид. Каква е таа дебата, каков е тој дијалог? Не смееме ниту да го дозволиме тоа. Исто како да кажеме зошто го осудуваме холокаустот. Не го осудуваме ние холокаустот, ниту српскиот народ ниту Србија. Има конкретни одлуки од страна на Трибуналот, тие луѓе се осудени и тие не смееме да ги глорифицираме. Не смееме да го одрекуваме“,
додаде шефот на македонската дипломатија.