Контролите во здравствените установи со кои има склучено договор, Фондот за здравствено осигурување ќе ги насочи особено во делот на наплатата на здравствените услуги и откривањето евентуални неправилности при наплата на услуги што се покриени од задолжителното здравствено осигурување
По случајот со злоупотреби и двојна наплата на операции на очи од страна на приватна болница, Фондот за здравствено осигурување (ФЗО) соопшти дека ги засилува контролите во здравствените установи со кои има склучено договор, особено во делот на наплатата на здравствените услуги и откривањето евентуални неправилности при наплата на услуги што се покриени од задолжителното здравствено осигурување.
Во рамки на контролите, посочуваат од Фондот, особено внимание ќе се посвети на усогласеноста меѓу извршените и фактурираните здравствени услуги, износите наплатени од осигурениците и почитувањето на прописите за учество со лични средства. Ако се утврдат неправилности, ФЗО ќе преземе мерки во рамките на своите надлежности, согласно договорите склучени со здравствените установи и важечките законски прописи.
Од Фондот потсетуваат дека осигурениците не треба да плаќаат дополнителни суми за здравствени услуги покриени со задолжителното здравствено осигурување, освен законски предвидената партиципација, доколку е предвидена за конкретна здравствена услуга во примарната, секундарната или терцијарната здравствена заштита. Здравствените установи, пак, додаваат од ФЗО, се должни на видно место да ја истакнат висината на партиципацијата и за секоја наплата да издадат соодветен доказ.
„Осигурениците кои располагаат со информации за евентуална неоснована наплата на здравствени услуги можат да се обратат до Секторот за контрола на Фондот, при што нивните пријави ќе бидат разгледани со почитување на приватноста и заштитата на личните податоци, согласно закон“,
посочуваат од ФЗО.
Минатата недела беше откриен случај во рамки на кој приватна здравствена установа вршела злоупотреби, односно двојна наплата на операции за очи. Болницата повлекувала пари од Фондот за услугите за кои има склучено договор, а за истите услуги им наплаќала и на пациентите. Според истражните органи, со ваквата двојна наплата, биле оштетени меѓу 3 000 и 4 000 пациенти, а буџетот на ФЗО е оштетен за околу 1,7 милиони евра.