Од ВМРО-ДПМНЕ во денешната реакција велат дека Владата на ДУИ-СДС предлага скандалозна измена на Законот за заштита на културното наследство по итна постапка со цел што побрза реализација на Коридорот 8 на Артан Груби
Освен за предлог-измените на овој закон, од ВМРО-ДПМНЕ засега нема реакција за другите осум. „360 степени“ прво се обиде да добие став од партијата од каде што нè упатија да се обратиме до координаторот на пратеничката група на ВМРО-ДПМНЕ, Никола Мицевски. Тоа и го сторивме, а единствената повратна информација што ја добивме е: „Мислам дека партијата излезе со став по овие закони. Тој е официјалниот“
ВМРО-ДПМНЕ денеска излезе со реакција за предлог-измените на Законот за заштита на културно наследство кои заедно со уште осум други измени на закони в понеделник треба да се најдат на пленарна собраниска седница по скратена постапка. Предлог-измените и дополнувањата на законите, предложени од пратеници од партиите од мнозинството, се поврзани со изградбата на автопати од коридорите 8 и 10-д.
Освен за Законот за заштита на културно наследство, пратениците ќе треба да се изјаснат и за предлог-измени и дополнувања на законите за земјоделско земјиште, експропријација, урбанистичко планирање, минерални суровини, работни односи, шуми, градење, како и за утврдување јавен интерес и номинирање на стратешки партнер за имплементација на проектот за изградба на инфраструктурниот Коридор 8 и Коридор 10-д.
Од ВМРО-ДПМНЕ во денешната реакција велат дека Владата на ДУИ-СДС предлага скандалозна измена на Законот за заштита на културното наследство по итна постапка со цел што побрза реализација на Коридорот 8 на Артан Груби.
Уште се порачува и дека ДУИ ја става изградбата на овој коридор над постоечката законска регулатива за заштитеното културно наследство.
„Со Законот пропишаната регулатива во членот 65 (доколку изведувачот на градежните работи дојде до археолошко наоѓалиште е должен веднаш истото да го пријави во надлежната културна установа за заштита), Владата на ДУИ и СДС по кратка постапка бара вметнување нов став во членот 65 со кој се заобиколува оваа процедура и, конкретно, членот 129 кој ја дефинира постапката“,
велат од партијата.
Власта, додаваат од ВМРО-ДПМНЕ, повикувајќи се на јавниот интерес, прави обид културното наследство да го претстави како нечиј личен интерес, а не темел на државноста. При идните градежни активности, со предлог-измените на Законот се предвидува надлежната установа за заштита да биде едноставно премостена и потенцијалните археолошки откритија да бидат пријавувани кај надзорниот инженер на Коридорот 8, без да се нагласи за каков инженер се работи. Тој, надзорниот инженер, ќе стане фактор кој ќе ги обезбедува археолошките наоди и ќе ги зачува местото и состојбата во кои тие се најдени, додаваат од партијата.
„Надзорниот инженер на Коридорот, кој нема апсолутно никакво познавање од археологијата и културното наследство, ќе треба лично да утврди што се нашло при работата и што од најденото се уништило, како и дали на местото има културно наследство или не“,
велат од ВМРО-ДПМНЕ.
Од партијата порачуваат дека оваа јасно манифестирана негрижа е воочлива и во неодамнешната изјава на министерката за култура која пред јавноста објаснуваше дека не е ништо страшно Охридскиот регион да биде ставен на листата за културно наследство во опасност на УНЕСКО.
„Според Бисера Констадиновска-Стојчевска, за нас како држава тоа би значело и поголем пристап до фондовите кои би можеле да ги користиме, а потоа по исполнувањето на одредени препораки, повторно ќе биде вратен и тоа, замислете, имало можност и за неколку места погоре. Да не е смешно, ќе биде иронично, но за жал, не е. Ќе се уништува културното наследство, а потоа со фондови подобро ќе се чува. Оваа алчна влада на која главна преокупација ѝ се пари не донесе до овој скандалозен предлог-закон кој никако не смее да помине“,
велат од ВМРО-ДПМНЕ.
Оттаму прашуваат дали некој го има прашано УНЕСКО што мисли за овој обид на заобиколување на Законот за заштита на културното наследство за археолошките наоѓалиште при градба.
Освен за измените на овој закон, од ВМРО-ДПМНЕ досега нема реакција за другите осум, со кои, исто така, се суспендираат некои актуелни или се воспоставуваат нови многу пофлексибилни правила што ќе важат за „Бехтел и Енка”.
„360 степени“ прво се обиде да добие став од партијата од каде што нè упатија да се обратиме до координаторот на пратеничката група на ВМРО-ДПМНЕ, Никола Мицевски. Тоа и го сторивме, а единствената повратна информација што ја добивме е: „Мислам дека партијата излезе со став по овие закони. Тој е официјалниот“.
Од сите партиски соопштенија што стигнуваат до редакцијата, во ниту едно нема став за другите предлог-измени и дополнувања на законите поврзани со изградбата на автопатите од коридорите 8 и 10-д.
Денеска со реакција за измените на овој закон излегоа и од Македонското археолошко друштво, археолошка фела и стручните лица во установите за заштита на културното наследство кои велат дека предлогот на група пратеници во Собранието на Македонија за дополнување на Законот за заштита на културното наследство, е изработен без вклучување и консултирање на стручната јавност.
Оттаму го повикаа пратеникот Арбер Адеми, како овластен предлагач, како и другите пратеници предлагачи итно да го повлечат предложеното дополнување на Законот, а Владата да не дозволи заради бизнис-интересите на одредени политички дисиденти да биде инвеститор во уништувањето на заедничкото културно наследство кое треба да го оставиме на идните генерации. Од Македонско археолошко друштво апелираат до пратениците во Собранието да ја разбудат својата свест и совест, да го спречат донесувањето на криминални и штетни измени во Законот за заштита на културното наследство.