Рафинеријата произведува бензин, дизел, керозин и други нафтени производи, вклучително и гориво што го користи руската војска
Украинските сили извршија напад со беспилотно летало врз рафинерија за нафта во рускиот град Омск. Рафинеријата за нафта во Омск е најголемата во Русија, со дизајниран капацитет од околу 22 милиони тони сурова нафта годишно. Рафинеријата произведува бензин, дизел, керозин и други нафтени производи, вклучително и гориво што го користи руската војска. Се наоѓа на околу 2 700 километри од територијата под контрола на Украина и во близина на границата на Русија со Казахстан.
Објектот претходно се сметаше за надвор од дофатот на офанзивната кампања на Киев, но според украинските сили за специјални операции нападот оштетил критична опрема во фабриката, особено главната единица за рафинирање нафта, опишана како најважна компонента на рафинеријата.
Генералштабот на украинските вооружени сили соопшти дека по нападот со беспилотно летало избувнал пожар на местото. Украинските власти изјавија дека Омск е последниот од 11-те големи производители на нафта во Руската Федерација кој бил погоден од украинските сили, што ја нагласува големата кампања на Киев против рускиот рафинериски сектор.
Нападот на рафинеријата го потврди и Виталиј Хоценко, гувернер на регионот Омск. Тој рече дека Украина ја нападнала рафинеријата и оти руската воздушна одбрана уништила поголем дел од беспилотните летала кои биле вклучени во нападот. Хоценко додава дека во нападот нема жртви додека службите за итни случаи работат на местото на настанот.
Инаку, Омск е една од двете рафинерии што се на листата на десетте најголеми во Русија што не биле цел на украински беспилотни летала. Другата е петрохемиската компанија „Ангарск“ во регионот Иркутск.
Претставниците на „Газпром нефт“, кој е сопственик на рафинеријата Омск, сè уште не го коментирале инцидентот, а нема и никакво официјално соопштение од самата фабрика.