Со предложените измени се овозможува бескрупулозно легално уништување на културното наследство во име на стратешко партнерство и јавен (бизнис) интерес, велат од Македонското археолошко друштво
Оттаму го повикаа пратеникот Арбер Адеми, како овластен предлагач, и другите пратениците предлагачи итно да го повлечат предложеното дополнување на Законот, а Владата да не дозволи заради бизнис-интересите на одредени политички дисиденти да биде инвеститор во уништувањето на заедничкото културно наследство кое треба да го оставиме на идните генерации
Македонското археолошко друштво за в понеделник во 10 часот најави дека пред Собранието ќе го искаже својот револт од предлогот на пратеничка група за измени во Законот за заштита на културното наследство кој ќе се најде во собраниска процедура по скратена постапка. Од Македонското археолошко друштво упатија апел на протестот да им се приклучат претставници од Министерството за култура, Управата за заштита на културното наследство, установите за заштита, како и сите засегнати граѓани.
Македонското археолошко друштво, археолошка фела и стручните лица во установите за заштита на културното наследство велат дека предлог на група пратеници во Собранието на Македонија за дополнување на Законот за заштита на културното наследство, е изработен без вклучување и консултирање на стручната јавност.
„Очигледно е дека со предложеното додавањето на еден став во член 65 од Законот се прави обид за целосно заобиколување на Министерството за култура, Управата и надлежните установи за заштита. Со предложените измени се овозможува бескрупулозно легално уништување на културното наследство во име на стратешко партнерство и јавен (бизнис) интерес, односно како што е наведено во предложениот текст во име на: „Ефикасна имплементација на Законот за утврдување на Јавен интерес и номинирање на стратешки партнер за имплементација на проектот за изградба на инфраструктурниот Коридор 8 (Делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10 д (Делница на автопатот Прилеп– Битола)‟,
наведуваат од Македонско археолошко друштво.
Апсурдот да биде поголем, додаваат од Македонско археолошко друштво, понатамошното образложение на предлогот гласи: „Меѓутоа, нивната реализација може да се соочи со потешкотии поради обврските кои настануваат за изведувачите на работите при наоѓање на археолошко наоѓалиште, односно предмети од археолошко значење во текот на изведување на градежните работи‟. За ова, како што наведуваат од Македонско археолошко друштво, пратениците измислиле „решение со кое го надминуваат проблемот‟, а кое е надвор од секакво здраворазумно однесување на совесни граѓани на оваа држава, уште помалку на пратеници.
„Господата пратеници, отворено и без нималку свест и совест за културните вредности на државата, бараат да се занемари заштитата на културното наследство која како темелна вредност е од исто толку голем јавен интерес за државата и нејзините граѓани и се остварува задолжително на територија на целата држава, без исклучок. Оттука не смеат да се дозволат било какви отстапки и законски процедури со кои остава простор за уништување на културно наследство, без разлика на инвеститорот и стратешкиот интерес“,
се наведува во соопштението од Македонско археолошко друштво.
Оттаму го повикаа пратеникот Арбер Адеми, како овластен предлагач, и останатите пратениците предлагачи итно да го повлечат предложеното дополнување на Законот, а Владата да не дозволи заради бизнис интересите на одредени политички дисиденти да биде инвеститор во уништувањето на заедничкото културно наследство кое треба да го оставиме на идните генерации. Од Македонско археолошко друштво апелираат до пратениците во Собранието да ја разбудат својата свест и совест, да го спречат донесувањето на криминални и штетни измени во Законот за заштита на културното наследство.
„За шверцерскиот обид со кој би се легализирало уништувањето на културното наследство Македонското археолошко друштво ги извести сите политички фактори во државата, претставниците на дипломатскиот кор и меѓународните институции за заштита на културното наследство“,
додаваат од Македонско археолошко друштво.
Претседателот на Собранието, Талат Џафери за в понеделник закажа итна седница на чиј дневен ред се девет предлог-закони поврзани со коридорите 8 и 10-д. Станува збор за предлог-измени и дополнувања на законите:
- за земјоделско земјиште;
- за експропријација;
- за заштита на културното наследство;
- за урбанистичко планирање;
- за минерални суровини;
- за работни односи;
- за шумите;
- за градење како и на
- за утврдување јавен интерес и номинирање на стратешки партнер за имплементација на проектот за изградба на инфраструктурниот Коридор 8 и Коридорот 10-д.
Сите измени се поврзани со изградбата на автопатските делници од споменатите коридори кои ќе ги гради американско-турскиот конзорциум „Бехтел и Енка“.
Предлагачи на измените и дополнувањата по скратена постапка се пратеници од СДСМ, ДУИ и Алијанса за Албанците.