Под дрвото завршиле по четворица држвјани на Хрватска и на Чешка
извор: ХРТ
Осуммина хрватски и чешки државјани, меѓу кои три деца, се полесно повредени откако денеска врз нив паднал бор на плажата пред хотелот „Цриквеница“, а по извршените прегледи сите се пуштени од Клиничкиот болнички центар во Риека, соопшти приморско-горанската полиција.
Борот, висок 13,5 метри, паднал денеска околу 11:10 часот, откако стеблото се скршило кај коренот. Под него се нашле четворица хрватски и четворица чешки државјани, меѓу кои две деца од Хрватска и едно од Чешка.
Сите успеале да се извлечат од под стеблото пред да пристигнат полицијата и другите итни служби. Се здобиле со површински рани и гребнатини и превентивно биле пренесени во Клиничкиот болнички центар во Риека, од каде што по прегледите биле пуштени.
Материјална штета немало.
Комуналното претпријатие од Цриквеница „Еко-Мурвица“ изрази жалење поради настанот и најави дека, во соработка со експерти и надлежните служби, ќе ги утврди околностите што довеле до паѓање на дрвото.
Станува збор за алепски бор, вид кој природно развива релативно плиток корен. Од „Еко-Мурвица“ наведуваат дека врз стабилноста на зрелите дрвја можат да влијаат повеќе фактори, меѓу кои долготрајната суша, како и карактеристиките на почвата и теренот.
Плажата се наоѓа на насипан терен, што исто така може да влијае врз стабилноста на коренот, наведуваат од комуналното претпријатие.
По овој настан, „Еко-Мурвица“ најави дополнителна проверка на дрвјата на оваа плажа и на други фреквентни јавни површини, со цел да се утврди дали има дрвја за кои се потребни дополнителни стручни процени или мерки.
„Прво се слушна кршење, а потоа луѓето почнаа да врескаат“
Жителка на Загреб била сведок на паѓањето на борот и раскажа дека, според неа, дрвото се урнало речиси само од себе.
„Во суштина, борот падна сам од себе. Зошто и како, тоа веројатно ќе го утврдат. Нашите крпи останаа таму, ги нема никаде“, рече таа.
Таа се присети и на моментите непосредно пред несреќата.
„Прво се слушна како нешто да пукна. Веројатно пукнало долу, при основата на стеблото. Потоа луѓето почнаа да врескаат, а сите ние веднаш станавме и потрчавме“, раскажа сведокот.