Против четворицата е поднесено обвинение за сторено дејство кое содржи елементи на кривичното дело предизвикување омраза, раздор или нетрпеливост врз национална, расна, верска и друга дискриминаторска основа
Основното јавно обвинителство (ОЈО) Скопје бара Кривичниот суд да им го продолжи притворот на четворицата обвинети за сквернавење на државното и на албанското национално знаме. Против четворицата е поднесено обвинение за сторено дејство кое содржи елементи на кривичното дело предизвикување омраза, раздор или нетрпеливост врз национална, расна, верска и друга дискриминаторска основа.
Тројца од обвинетите се осомничени дека на 28 ноември, на прославата на Денот на независноста на Албанија и на албанското знаме, го кинеле, палеле и уништување државното знаме и предизвикале чувства на омраза, раздор и нетрпеливост врз основа на етничка припадност и го изложиле на подбив националниот симбол.
„Четвртиот обвинет, неколку дена подоцна, на 2 декември, со палење го оштетил знамето на друга држава – Република Албанија, со што исто така предизвикал омраза и нетрпеливост“,
посочуваат од Обвинителството.
Дејствијата на сите обвинети, додаваат од ОЈО Скопје, предизвикале говор на омраза што на критичните денови се манифестирал особено на социјалните мрежи со тенденција да прерасне во нови инциденти на насилство.