Во соопштението за отворената истрага се наведува дека осомничениот управувал со возилото „мерцедес“ со кичевски регистарски таблици, но не се посочува експлицитно дека станува збор за Зоран Милески-Кичеец
Основното јавно обвинителство – Гостивар донесе наредба за спроведување истражна постапка против едно лице за кое бара и притвор за тешката сообраќајна несреќа што се случи пред неколку дена на патот Кичево-Гостивар, а во која загина едно лице, а неколку беа повредени.
Осомничениот се товари за кривично дело „тешки дела против безбедноста на луѓето и имотот во сообраќајот“, според член 300 став 2, во врска со член 297 став 1 од Кривичниот законик.
Во соопштението од обвинителството се посочува дека осомничениот управувал со возилото „мерцедес“ со кичевски регистарски таблици, но не се наведени детали дека станува збор за Зоран Милески-Кичеец, еден од осудените во случајот „Рекет“, чие учество во сообраќајката предизвика посебено внимание во јавноста, затоа што тој, всушност, издржува на затворска казна.
Во полицискиот билтен, ден по сообраќајката, беше посочено дека лицето З.М. (41) од Охрид – податоци што упатуваат на Кичеец, управувал со моторно возило ’мерцедес‘ со кичевски регистарски ознаки, а негови сопатници биле П.Ж.(51) и М.М.(42) двајцата од Србија, кои се здобиле со тешки повреди. За З.М., пак, беше наведено дека се здобил со телесни повреди.
Како што соопштија од Обвинителството, на 4 септември, на магистралниот пат Кичево-Гостивар, осомничениот, како учесник во сообраќајот на јавните патишта, не се придржувал кон прописите и го загрозил јавниот сообраќај. Движејќи се со патничко моторно возило „мерцедес“, со кичевски регистарски ознаки, тој на критичното место не ја прилагодил брзината на движење според состојбите и условите на патот и на видно обележана полна надолжна линија започнал престигнување на возилото пред него – автомобил „БМВ“ со тетовски регистарски ознаки.
Во истиот момент, во обратна насока кон Кичево, се движел автомобил „санг јонг“ со гостиварски ознаки, на кое осомничениот му го попречил патот, па директно удрил со предниот десен дел од „мерцедесот“ во предниот десен дел од автомобилот „санг јонг“. Удреното возило со левиот страничен дел, пак, удрило и во автомобилот „БМВ“ кој бил претекнуван.
Во несреќата, животот го загубил сопатник во автомобилот „санг јонг“, четири лица се здобиле со тешки телесни повреди, а тројца, меѓу кои и осомничениот, се здобиле со телесни повреди.
Обвинителството бара од Основниот суд во Гостивар да му определи притвор на осомничениот, поради, како што се наведува, опасност од бегство, можност за влијание врз сведоците/оштетените и можност за повторување на делото.