Кичеец помина со полесни повреди, додека неговите сопатници од Србија имале тешки повреди. Во сообраќајката во која учествуваа вкупно три возила, едно лице го загуби животот
Осудениот во „Рекет“, Зоран Милески – Кичеец, кој вчера учествуваше во тешката сообраќајка на патот Гостивар-Кичево, управувал со возилото марка „мерцедес“, а како сопатници со него биле двајца државјани на Република Србија, П.Ж. (51 година) и М.М. (42 години).
Овие детали ги открива денешниот полициски билтен.
Во сообраќајката учествуваа три возила, а на самото место загина едно лице кое било сопатник во камионетот марка „фургон сагјонг“. Кичеец, пак, се здобил со полесни повреди, а неговите сопатници од Србија со тешки повреди.
„На 04.09.2021 околу 15:30 часот било пријавено дека на магистралниот пат Гостивар-Кичево, во близина на новоселски гробишта во с. Ново Село се случила сообраќајна незгода помеѓу патничко моторно возило ’мерцедес‘ со кичевски регистарски ознаки, управувано од З.М.(41) од Охрид, патничко моторно возило БМВ со тетовски регистарски ознаки, управувано од Е.Н.(23) од тетовското село Радиовце, и товарно моторно возило ’фургон сангјонг‘, со гостиварски регистарски ознаки, управувано од Б.Љ.(32) од гостиварското село Д. Бањица. На местото на незгодата починал сопатникот од товарното возило С.Е.(34) од Гостивар. Со тешки телесни повреди се здобиле двајца сопатници од возилото ’мерцедес‘ П.Ж.(51) и М.М.(42) двајцата од Р. Србија, сопатникот од товарното моторно возило М.К.(31) од Гостивар и возачот Б.Љ., а со телесни повреди се здобиле возачите З.М. и Е.Н. како и сопатникот од возилото БМВ Р.Р.(23) од тетовското село Г. Палчиште констатирани во Ургентниот Центар во Гостивар“,
пишува во полицискиот извештај.
Од МВР додаваат и дека увид на местото извршиле полициска екипа од Гостивар, а на терен бил и јавен обвинител.
Кичеец е осуден на тригодишна затворска казна откако призна вина во случајот „Рекет“ каде се осудени и Бојан Јовановски – Боки 13 и Катица Јанева.
По правосилноста на неговата пресуда, тој лани во октомври влезе во Казнено-поправниот дом (КПД) Струга, а во моментов се наоѓа на 30-дневен прекин во извршувањето на казната. Како што вчера објаснија од Управата за извршување санкции, прекинот му е даден поради здравствени причини и трае до 8 септември.
Кичеец има одлежано повеќе од половина од казната, а затворот во Струга е од отворен тип што значи дека тој има право и секојдневно да излегува од затворот доколу е вработен, да користи викенд еднаш месечно, како и годишен одмор од 22 дена.