Од платформата им честитаа на граѓаните на Србија за големиот одѕив на изборите, а на Студентската листа за истрајноста, упорноста и принципиелноста и освоената доверба кај големото мнозинство од српскиот народ, оценувајќи дека ова е уште една потврда oти демократските промени мора да бидат рефлексија на слободно изразена волја. Оттаму се осврнаа и на вчерашните претседателски избори во Бугарија, оценувајќи дека слабиот одѕив во првиот изборен круг е резултат на актуелната политичка понуда
По Унгарија, добивме уште еден пример дека граѓаните се уморни од традиционалните политички опции, долгогодишните професионални политичари и корупциски профитери. Затоа се приклонуваат кон автентични политички коалиции на прогресивната демократска јавност. Ваков е коментарот на платформата „Разговори за иднината 12:05“ по изборната победа на Студентската листа на предвремените парламентарни избори во Србија.
„Уште еднаш се потврди дека без вистинско обединување на целокупната опозициска, прогресивна, демократска јавност е речиси невозможно да се победат десничарските популистички власти на Балканот“,
велат од платформата.
Оттаму им честитаа на граѓаните на Србија за големиот одѕив на изборите, а на Студентската листа за истрајноста, упорноста и принципиелноста и освоената доверба кај големото мнозинство од српскиот народ, оценувајќи дека ова е уште една потврда oти демократските промени мора да бидат рефлексија на слободно изразена волја.
„Земајќи предвид дека безмалку цели две години во Србија се практикуваше улична демократија која предизвикуваше драматични политички тензии, сега после демократската смена на власта, посакуваме брзо нормализирање на внатрешните состојби кои се предуслов за стабилност во целиот регион“,
коментираат од „Разговори за иднината 12:05“.
Оттаму се осврнаа и на вчерашните претседателски избори во Бугарија, оценувајќи дека слабиот одѕив во првиот изборен круг е резултат на актуелната политичка понуда. Ја обвинија в.д. претседателката Илијана Јотова дека го злоупотребила бегството на Ива Михаилова за својата кампања и изразија очекување дека пред вториот изборен круг ќе покаже политичка мудрост и ќе иницира постапка за нејзина екстрадиција во земјава.
„Земајќи предвид дека во моментот кога се потпишуваше фамозниот Договор за добрососедство Јотова беше потпретседателка на Румен Радев, таа има морална одговорност да ја прекине спиралата на непотребни провокации од Софија. Во спротивно, доколку и во кампањата за вториот круг се пласираат радикални ставови со кои драматично се нарушуваат билатералните односи, кандидатите треба да бидат свесни дека со таквиот пристап во Македонија го зголемуваат внатрешниот притисок за преиспитување на Договорот за добрососедство“,
велат од платформата.
Од платформата посочуваат дека вчерашните избори во Србија и во Бугарија потврдуваат дека борбата за полноправно членство во Европската Унија не подразбира прифаќање национални отстапки без широка поддршка од македонските граѓани. Според нив, млаките реакции на провокациите од официјална Софија не ја приближуваат Македонија до ЕУ, туку ги продлабочуваат внатрешните поделби и го отежнуваат постигнувањето консензус за клучните реформи што ги надминуваат мандатите на поединечните влади.
Оценуваат дека политичките процеси во соседните земји се поттик за исполнување на предизборното ветување за воведување една изборна единица со отворени листи пред следните парламентарни избори. Истовремено ја истакнуваат и улогата на студентите и младите како значаен фактор во политичките промени, нагласувајќи дека нивниот потенцијал треба да се препознае независно од етничката и верската припадност.