Се одлагаат јавните седници и расправи пред Апелацискиот суд Скопје, закажани во периодот на времетраење на вонредната состојба, соопштија од овој суд.
За новите датуми, велат оттаму, и странките во предметите и јавноста ќе бидат дополнително известени.
Ваквото одложување доаѓа откако минатата недела претседателот Стево Пендаровски прогласи нова вонредна состојба поради епидемијата со ковид-19.
И пред околу еден месец Апелација, како и сега, информираше дека ги одложува седниците од истата причина.
Меѓу предметите што се наоѓаат пред овој суд, а се одложија поради коронавирусот, има и неколку кои јавноста ги следи со особен интерес, како на пример најголемиот судски процес за настаните од 27 април 2017 во Собранието.
На 18, 19 и 20 март требаше да се одржат седници по однос на жалбите за пресудата од Основниот кривичен суд, но тие се одложија. Во овој предмет предметот првично беа опфатени 33 лица, но 15 од нив добија амнестија со закон што Собранието го донесе во 2018 година. Од останатите, единствено Игор Дурловски доби ослободителна пресуда, додека другите добија вкупно 211 години затвор. Највисока казна доби поранешниот директор на Бирото за јавна безбедност Митко Чавков – 18 години затвор. Тие сега ќе чекаат да заврши вонредната состојбата поради епидемијата со вирусот, за да ги образложат своите жалби пред второстепениот суд.
Исто така, на 1 април требаше да се одржи и седница во рамки на случајот „Рекет“ на која беше предвидено обвинетиот Зоран Милески-Кичеец и неговиот адвокат Александар Новаковски да ја образложат жалбата за висината на затворската казна од три години. Таа беше досудена откако Кичеец на првото судско рочиште на 3 декември 2019 призна вина.