Порталот „Лидер“ вечерва објави нова аудиоснимка од состанок во кабинетот на генералниот секретар на владата, Драги Рашковски, на која може да се слушнат делови од разговор или разговори каде се споменува постапката за купување на радарска опрема за М-НАВ од италијанската компанија „Леонардо“. За разлика од првата „бомба“ која беше објавени на руска интернет страница, оваа е пократка и е објавена на популарниот видео сервис Јутјуб. Порталот тврди, ја добиле снимката од укажувач, на мемориски стик.
Во својот текст медиумот тврди дека аудиснимката е доказ дека генералниот секретар на владата бил свесен дека во тој момент не смеел да разговара со претставниците на „Леонардо“. Во записот објавен на Јутјуб се слуша дека дел од присутните велат дека не смее да се прави записник, но исто така е лесно воочливо дека снимката на две места е „исечена“ па не е докрај јасен контекстот.
Очекувано е сепак снимката да предизвика нови реакции бидејќи по првата „бомба“ за случајот се заинтересира Антиркорупциската комисија, а опозициската ВМРО-ДПМНЕ поднесе и кривична пријава до Обвинителството. Рашковски на прес конференција ги отфрли сите сомнежи, дека договара наводна „аванта“ од милиони евра, и се извини само за делот од разговорот каде со погрдни зборови ги нарекува Италијаните и Ромите. Но самата прес-конференција предзвика друг ланец на реакции кај новинарските здруженија и АВМУ бидејќи Рашковски од владината говорница се закани со тужби. Во целосна одбрана на Рашковски застана премиерот Заев, кој кажа дека генералниот секратар добил задача од владата да откочи заглавена постапка која ја загрозува безбедноста на македонското небо.