Премиерот Зоран Заев вели дека засега нема намера да го разреши генералниот секретар на владата, Драги Рашковски. Ставот на првиот човек на владата доаѓа ден по прес-конференцијата на Рашковски, на која генералниот секретар јавно образложуваше дека не сторил ништо незаконско во врска со набавката на радарска опрема за М-НАВ и притоа најави тужби за сите кои го довеле неговото име во врска со случајот.
„Се работи за тендер кој е завршен во 2016 година и некој не сакал да го потпише, за тоа ќе има истрага и кривични. Рашковски имал апсолутно право да ги забрзува постапките. Секој кој е арогантен треба да понесе одговорност, но секој има право да даде образложение. Не може некого да правите салата, кога сакате и како сакате, тој има право да го заштити својот дигнитет. Кога прифаќаме функции да служиме на народот, тоа не значи дека секој може да биде и боксерска вреќа и кога тоа го залужува или не. Секој има право на човечко достоинство и право да го заштити своето достоинство“
изјави денеска премиерот Зоран Заев
Со ваквиот став премиерот застана целосно во одбрана на Рашковски. И во врска со неговото дејстувување при процедурата за набавка на радарската опрема и за однесувањето на Рашковски на вчерашната прес-конференција. А токму најавите на Рашковски од владината говорница дека ќе ги тужи сите кои фрлиле сомнеж врз неговото име, предизвикаа најсилни реакции. И од новинарските здруженија, но и од Агенцијата за аудио и аудиовизуелни услуги.
Јавноста реагираше и на навредите на Рашковски кои можеа да се слушнат во снимениот разговор во неговиот кабинет, кој беше и иницијална каписла за целиот случај. Меѓу другото, на снимката тој искажува погрдни зборови за Италијаните и Ромите. Премиерот Зоран Заев нема да бара одговорност од Рашковски ниту за тоа, но првиот човек на владата веќе се сретнал со италијанскиот амбасадор во земјава а најави и извинување до официјален Рим.